蓋世寶陳以誠10年後再合體唱抗疫兒歌 網民：回憶返晒嚟！

身為8、90後，對兒歌醫生陳以誠同童顏蓋世寶一定唔會陌生啦～細個放學返到屋企，一開電視就會見到蓋世寶姐姐主持兒童節目，有時都會見到陳以誠醫生喺兒童節目上露面，會同蓋世寶姐姐一齊唱兒歌，又會教小朋友一啲健康小知識！

相隔10年之後，兒歌醫生陳以誠同前兒童節目主持蓋世寶再次合體，將經典作品《超級流感》重新編曲改詞，成為新一代抗疫兒歌《擊退病毒》。

Photo from 《擊退病毒》

「兒歌醫生」陳以誠多年嚟有多首經典歌，好像係《超級流感》、《八千步》、《滅蟲週記》，當中《超級流感》入面嘅「怎麼可以預防流行性感冒」更喺嗰陣唔少小朋友被洗腦～唔少網民到依家都印象深刻。

Photo from TVB

喺2003年SARS爆發嘅時候，陳以誠都創作咗首《眾志成城抗肺炎》，歌詞中嘅：「我怕已中招驚發燒，又心跳驚恐感染，身處惡夢，盼快夢醒」，依家聽返一樣咁有共鳴。

Photo from 《擊退病毒》

而久未開金口嘅陳以誠醫生再次出山！以《擊退病毒》教人抗疫：「怎麼可以預防新冠狀病毒？怎麼可以不怕碰到病魔？小心自摸，廁所要冚蓋，梘液廿秒洗手重要。」

Photo from 《擊退病毒》

網民見到久違嘅陳醫生都留言指好想念，又稱：「嘩！好耐無聽過呢種咁Hk style嘅兒歌，係回憶！係愛啊！」；「冇咗鬍鬚嘅陳醫生，感覺唔似佢！但把聲仲Keep到，掂！」；「當年首非典型肺炎仲歷歷在目?」，仲大讚蓋世寶唔識老添～

Photo from 《擊退病毒》

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）