日本最孤獨的海豚 困於狹窄泳池過活 終患腸炎完結坎坷一生！

日本「最孤獨的海豚」Honey上月底因患腸炎離世，終於可以離開呢個剝奪咗一生自由嘅狹窄泳池，自由了！

Photo from Animal Rights Center Japan

海豚Honey係一隻2005年喺日本和歌山「血色海灣」太地町捕捉到嘅瓶鼻海豚，之後，就被人賣到日本千葉縣犬吠埼海洋公園作表演工具！

賣到去當地嘅海洋公園之後，佢同同伴一齊被困喺一個泳池生活。去到2017年，佢唯一嘅同伴過世，就只剩返佢一個！

Photo from Dolphin Project

喺2018年1月底，日本千葉縣犬吠埼海洋公園因為旅客數量暴跌，突然結業，遺下咗海豚Honey、46隻漢波德企鵝、幾百條魚同埋一啲爬行動物。

Photo from Dolphin Project

當時，當地嘅動物保護組織Animal Rights Center指佢哋檢查公園設施嘅時候發現，海豚Honey有壓力嘅跡象，頭部上水、落水時嘅動作都變得微弱。

可以見到水族館嘅設施已經非常殘舊，啲水都變成綠色，似好耐都冇人打理！喺呢個狹窄而且殘破不堪嘅地方，獨自生活，可以想像到佢嘅日子係幾難過！

Photo from Dolphin Project

而海豚保護團體Dolphin project都一直嘗試買Honey，希望可以帶佢離開呢個冇自由嘅地方！但都未等到呢一日，佢就因爲阻塞性腸炎結束咗被困嘅坎坷一生！

人類嘅開心就係建築喺呢啲無辜嘅動物身上！為咗利益，就犧牲咗動物應有嘅自由！

小編希望世界上唔會再有第二條Honey，冇買賣冇傷害，謝絕一切動物表演！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）