兩喪偶企鵝相偎看海 擦背安慰對方 畫面淒美！

失去另一半固然可惜，但當你知道有人願意同你分擔痛楚，陪著你度過艱難嘅時刻，就會有勇氣活下去！

外國有位攝影師Tobias Baumgaertner花咗整整3晚嘅時間，拍低咗兩隻喪偶嘅企鵝喺其他同伴玩緊、瞓緊嘅時候，默默地企喺石上欣賞墨爾本夜景嘅相片！

佢哋一企就企幾個鐘，有時望向天空，好似一齊懷念已經離開咗嘅另一半；有時望海，好似感嘆「鵝生苦短」；一時睇下墨爾本璀璨燈飾，感覺就好似感恩有大家存在，互相扶持！

Photo from IG@tobiasvisuals

攝影師就話，拍攝過程中，你會見到佢哋手牽手、左邊雄性企鵝會擦擦雌性企鵝嘅背脊，以示安慰，亦會見佢哋說悄悄話！彷彿世界就得返佢哋兩個，相依為命！

Photo from IG@Tobiasvisuals

佢覺得，痛苦將呢2隻企鵝拉埋一齊，「我哋通常都會喺無預期下會遇上真愛，真正咁愛一個人係一種榮幸，當佢同一時間都愛上你，就好似天堂般咁美好！」

Photo from shutterstock

感謝攝影師拍低咗咁美麗嘅一刻！「A good photo tells story.」

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）