意大利研究：懸浮粒子含新冠病毒 隨空氣擴散 或致大規模感染！

新冠肺炎（武漢肺炎）全球肆虐，無處不在！有意大利學者最近發現空氣污染入面嘅懸浮粒子含有新冠病毒！病毒可以隨空氣擴散至更遠嘅地方，或會引致大規模感染！

根據《衞報》報道，意大利波隆納大學研究團隊早前採集咗意大利北部嘅貝加莫（Bergamo）市區同工業區收集空氣污染嘅樣本，驗出幾個樣本入面都有新冠病毒嘅基因。

Photo from shutterstock

佢哋表示：如果飛沫同污染粒子結合，污染粒子就會變得更大，密度更細，所以停留喺空氣耐啲，傳播距離就更遠。而意大利北部係歐洲空氣污染最嚴重嘅地區之一，咁就可以解釋到點解佢哋嘅感染率咁高！

Photo from shutterstock

佢認為呢次研究有重大突破：「如果我知道，我們可以搵到解決方法。但如果我哋唔知道，我們就只能承擔後果。」

而英國布里斯托爾大學（University of Bristol）教授Jonathan Reid亦有研究冠狀病毒透過空氣傳播嘅可能性，佢不約而同都話：「飛沫可以同都市中嘅粒子結合，被帶到唔同地方，發生呢樣嘢絕對唔出奇。」

愛爾蘭科克大學（University College Cork）教授John Sodeau都認同上述推論！只係有咗「假設」、「舉證」，之後就要不斷做實驗，再三證實！大概用上2、3年時間先能夠得知，空氣污染同傳播疾病嘅關係有幾高！

Photo from shutterstock

世衞曾發表一項研究指，新冠病毒可以喺空氣中存活，但主要係透過飛沫或少量液體傳播（例如打噴嚏或咳嗽）。世衞組織新興疾病部門主管官員范科霍芙（Maria Van Kerkhove）表示，新冠病毒可懸浮喺空氣，並通過空氣傳播，但一切取決於熱量同濕度等因素。

Photo from shutterstock

雖然呢個研究只係處於初步階段，但一步一步搵出感染途徑及原因，都可以有效抑制病毒蔓延，唔會再有咁多人犧牲！如果證實到感染率係關空氣污染事嘅話，咁真係要正視問題！空氣污染帶嚟嘅影響絕對不容忽視！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）