日本便利店防疫法！「腳柄」打開雪櫃門阻病毒傳染

喺新冠肺炎疫情下，大家都盡量避免因為戶外接觸而沾上冠狀病毒，所以好容易會見到好多人唔願意㩒?，又或者開廁所門。喺日本同樣有好多人因為同一原因，對於接觸便利店雪櫃門柄有所避忌，正所謂小改變、大改善，有人想出辦法由手拉開門，變為腳拉開門，簡單咁就解決問題。

據日本朝日新聞報道，疫情下好多人都對共用物品嘅衛生相當關注，而便利店嘅飲品雪櫃門柄就係其中之一，每日都有數以千計人士打開呢度門，到底邊個係隱形帶菌者無人知。

喺福岡春日市有便利店老闆大原耕治先生為咗客人可以安心使用選購，就為雪櫃門柄這個問題花心思，想出由「手柄」變為「腳柄」。其原理真係好簡單，一個U形鋁片，短嘅一方連接雪櫃門，長嘅一方就可以讓客人用腳輕輕一拉，就可以打開雪櫃門，避免用手共同接觸手柄從而交叉感染。

整個安裝過程亦都好簡單，只需要10分鐘就完成。創作者大原先生覺得，雖然用腳開門對日本人來說唔太禮貌，但疫情之下好多人都願意接受新設計帶來嘅衛生環境。

無獨有偶，其實呢個設計喺香港都有代理出售，不過設計同日本有些少分別，日本是反轉U形使用，而香港版本是正U形使用，只要踏住腳踏邊，一拉就開到門。相信香港各大商場都應該考慮一下，加裝喺洗手間所有門啦。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）