《輪到你了》2.0？秋元康新作懸疑日劇《遙距被殺》本田翼/新田真劍佑/前田敦子主演

上年日劇《輪到你了》大熱，製作人秋元康再度推出懸疑新作《遙距被殺》（リモートででこら殺される），本田翼、新田真劍佑、前田敦子等主演，卡士強大，故事講述一班舊同學以視像通話聯繫，竟捲入連環殺人事件。

上年大熱日劇《輪到你了》曾引嚟一陣推理熱潮，雖然結局被批「爛尾」，但劇集喺海外都非常受歡迎。

《輪到你了》製作人秋元康今季再推出全新懸疑劇《遙距被殺》（リモートででこら殺される），故事背景仲設定係疫情期間進入外出自肅狀態嘅日本，令觀眾更加投入。

除咗劇情引人入勝之外，主演陣容都超級強大，有本田翼、新田真劍佑、前AKB48「一姐」前田敦子、乃木坂46人氣成員齋藤飛鳥等。

故事講述喺疫情之下，日本進入外出自肅狀態，一班高中舊同學包括：野島繪里（本田翼 飾）、野村優作（新田真劍佑 飾）、藤原太（柄本時生 飾）、井上透（早乙女太一 飾）、北川淳二（前野朋哉 飾）及松園佳代子（前田敦子 飾）喺網上以視像通話聚會。

其中藤原（柄本時生 飾）提到朝早有警察來訪，問佢識唔識一位名為「古郡一馬」嘅人，同埋最近有無同呢個人聯絡。原來其他人都同樣被警方查問。

古郡一馬嘅前女友野島（本田翼 飾）就指最近有時會見到佢。而大家都諗起高中時，同學田村由美子（齋藤飛鳥 飾）自殺身亡後，古郡曾提及過「除咗我哋之以外仲有人都喺屋頂」。

呢個時候，新聞突然報道古郡居住嘅公寓發生火災，並發現一具屍體。其中一位同學嘅門鐘突然響起......

同《輪到你了》一樣，喺劇集播出後會於網上平台Hulu播出「殺人事件內幕篇」，令大家對劇集嘅人物、發生事件更了解。

《遙距被殺》（リモートででこら殺される）

開播日期：7月26日

播映時間：22:30

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）