【斷捨離】五大方法處理二手衫　上門回收/寄賣/H&M/Uniqlo/ZARA

最近「斷捨離」嘅風氣某程度上令大家驚覺自己喺 Fast Fashion 嘅環境底下過度消費，執完嘢先發現自己有好多衫都無著過，甚至忘記咗佢哋存在！咁到底斷捨離之後，可以點樣處理啲二手衫，先可以減少浪費呢？

Photo from archiparti

1. Carousell

Carousell 呢個二手平台相信大家都唔陌生㗎啦！大家可以幫自己唔要嘅衣物影相同定價，然後等有興趣嘅買家查詢。呢個平台比較自由，咩都可以擺上去，就連著過嘅底衫褲我都見過（咁我當然唔建議咁做啦！），仲可以賺返少少錢添！但咁樣就未必可以即時為大家清理走晒啲舊衫，又或者會遇到買家反口唔買，所以大家自己衡量風險啦～

Photo from facebook＠carousell

Photo from carousell

2. 私人回收機構

本地有啲私人機構會有二手衫嘅寄賣服務，而規模比較大嘅就有 Green Ladies，佢係聖雅各福群會轄下的社企，喺灣仔、南豐紗廠同西營盤都有門市，而鋪頭主要都係寄賣二手衫！

另外，小編都留意到 IG 依家有唔少嘅二手衫店成立去對抗 Fast Fashion﹐而佢哋都會有二手衫寄賣／回收嘅服務，例如有 @asianangel_hk、@initia123_hk、@chan4room 同 @retrovert.hk 等。

寄賣服務可以令各位賣家賺返少少錢之餘，又可以幫啲舊衫搵到新主人，但係就未必所有衫都符合店鋪嘅寄賣準則，例如有啲鋪頭只係會收女裝／三年內買嘅衫咁，所以大家喺使用以上服務之前可以去佢哋嘅 page 了解一下詳情先～

Photo from facebook @sjsgreenlittle

Photo from instagram＠asianangel_hk

Photo from instagram＠initia123_hk

Photo from instagram＠chan4room

Photo from instagram＠retrovert.hk

3. 連鎖時裝店（Zara, H&M, Uniqlo)

喺全球化底下，就連唔同嘅連鎖時裝品牌都開始講企業責任！所以大家應該會見到有啲大牌子，例如 Zara、H&M 同 Uniqlo 會喺門市入面擺住舊衣回收箱，再將啲衫送去畀第三世界嘅難民循環再用，又或者拎去研發可持續原料。回收舊衣有機會拎到店鋪嘅 coupon 做回贈，但就要留意唔同嘅時裝品牌都會有唔同嘅回收限制同規則，例如 Uniqlo 淨係會回收返自己牌子嘅衣物。所以大家一定要 check 清楚先去呀～

Photo from cityplaza

Photo from hmhongkong官網

Photo from uniqlo官網

4. 非牟利團體（救世軍、長春社、綠惜地球、地球之友）

其實香港有唔少嘅非牟利團體都有舊衣回收服務，例如救世軍、長春社、綠惜地球、地球之友等，大家都可以將啲衫捐畀佢哋，再經佢哋手交畀有需要人士。除咗擺喺各區舊衣回收箱之外，救世軍、地球之友同長春社仲有上門回收衣物嘅服務，方便想清晒成個衣櫃嘅朋友！但由於疫症嘅關係，所以依家暫時就唔提供上門嘅服務。大家亦都可以參考下佢哋個網頁睇下去了解更多資訊㗎～

Photo from 救世軍

Photo from 長春社

5. 社區舊衣回收箱

呢啲社區舊衣回收箱就好似 7 仔咁，總有一個喺你附近！如果真係想即刻清走晒屋企堆舊衫嘅話，拎佢哋落回收箱都不失為一個辦法嚟！但呢個就要靠大家自發去清潔同整理啲舊衫先，同埋就要自覺啲，唔好將啲唔可以回收嘅嘢，例如係內衣褲、床上用品等都擺埋落去。另外，個箱一去到換季嗰時就會變到極 full ，大家記得喺回收舊衫之前先去望望個箱先，費事大家白行一趟啦！

Photo from 地球之友

以上嘅方法雖然有機會令到二手衫搵到新嘅主人，但因為唔係每件衫都可以成功回收到，所以浪費依然係存在㗎！其實講到尾，最妥善嘅方法就係減少衝動消費，唔好因為有折扣就買。每次買嘢之前諗清楚，咁就可以喺源頭到減少浪費啦！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）