【懷念哥哥張國榮】私心推介5首「哥迷」不可不聽冷門Side Track

「秋天該很好，你若尚在場。」哥哥張國榮唔經唔覺已經離開咗我哋 17 年，嚟緊 9 月 12 日就係哥哥嘅 64 歲冥壽，相信大家都會不斷 loop 住哥哥嘅作品去懷念呢位巨星。哥哥嘅歌太多經典，但同時都有唔少滄海遺珠係無咩人聽過。小編就想藉呢個機會向大家推介 5 首 Side Track，雖然冷門，但包保首首都係正嘢嚟！唔知大家又會識得幾多首呢～

Photo from kkbox

Photo from kkbox

1.「記否當天誰在痴痴等你 長夜問你可有想著我」－《痴心的我》 

Photo from youtube@音樂無疆界

《痴心的我》 收錄咗喺 1985 年推出嘅專輯《為你鍾情》入面，因為同專輯太多 hit 歌，所以令到呢首歌無咩人識。《痴心的我》由黎小田作曲同向雪懷填詞，描述咗分手後但仲好掛住對方嘅心態。哥哥唱呢啲深情慢歌嗰時，歌聲會有一分無奈同傷感，所以聽到就會覺得好到肉。

2. 「齊抬頭問雨點 可否灑一晚 相擁怎分散」－《雨中的浪漫》

Photo from kkbox

呢首 30 年前嘅歌放喺依家播都完全唔會過時！《雨中的浪漫》改編至日本組合 Weather Girl 嘅歌，係一首比較輕快嘅歌嚟，佢同樣係專輯《為你鍾情》嘅滄海遺珠嚟。潘偉源寫嘅歌詞完全將男人喺雨天想遮女神返屋企嘅心聲寫晒出嚟，就咁聽已經好有畫面！

3. 「願妳是我眼前燈 可以伴我渡過這良辰」－《一盞小明燈》

Photo from youtube＠華星唱片

《一盞小明燈》算係幾有節奏感嘅歌，所以聽落都覺得幾輕快同窩心。佢收錄咗喺 1984 年嘅專輯《Leslie》入面，同時佢都係電影《緣分》嘅插曲。呢首由鄭國江填詞嘅歌係講述一個深情嘅人希望守侯喺愛人身邊，而哥哥完全係演繹呢首「暖歌」嘅最佳人選！

4. 「來日悄悄我走了 悄悄得徬似午夜晚風飄  你將感覺到我沒有走遠，仍留在聽這舊調」－《願你決定》

Photo from kkbox

《願你決定》其實係哥哥翻唱呂方喺1995年嘅《無緣》，經過 Adrian Chan 嘅重新編曲同林振強嘅重新填詞，就成為咗呢首新嘅作品，最後仲收錄喺哥哥 2000 年推出的專輯《大熱》入面。歌詞就好似係講緊哥哥嘅心聲一樣，再加上哥哥用咁溫柔嘅聲線唱出嚟，雖然聽落係好 warm，但粉絲望到歌詞唔多唔少都會有啲心痛。

5. 「即使我如今一個漫遊 都想對你講祝你快樂未來前程錦繡」－《侯斯頓之戀》

Photo from kkbox

《侯斯頓之戀》收錄喺專輯《大熱》入面，但相比起主打歌《大熱》，《侯斯頓之戀》嘅編曲就無咁激，平淡嘅旋律講緊嘅係一個關於太空人嘅愛情，聽住林夕嘅詞，再加埋哥哥好溫柔咁唱出嚟，聽落覺得好舒服，好啱夜晚望住個天咁聽～

順帶一提，環球唱片喺哥哥冥壽當日就會推出《春夏秋冬》嘅重製版，聽講呢個版本係根據從未曝光過嘅錄音去重新編曲，到時大家又可以聽返哥哥把聲啦～

Photo from kkbox

其實哥哥仲有好多歌都好值得聽㗎，建議大家搵日慢慢細味品嚐哥哥嘅每一隻大碟！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）