金汎確定出演韓劇《Law School》！31 歲逆齡童顏飾演大學生！

《九尾狐傳》都仲未播，金汎就已經人氣暴升，近日已經確定佢將會出演 JTBC 新劇《Law School》！今次金汎仲係飾演大學生！雖然佢已經 31 歲，不過以佢童顏又高顏值嘅外表絕對冇問題！點解以前讀書嗰陣冇呢啲同學……

《Law School》以法律學院為背景，講述韓國最著名法律學院嘅教授同學生捲入前所未聞嘅事件後，展開校園懸疑故事。故事同時呈現咗充滿血、汗、淚嘅法律學院「生存記」，展現咗預備法律界人士喺過程中領悟到法律嘅真理同正義。

金汎喺劇入面飾演法律學院一年級學生「韓俊輝」，佢係法律學院一年級嘅第一名，唔單止係學霸，而且外形俊朗，充滿領導才能。不過喺佢完美嘅外表下其實隱藏咗反轉嘅故事，係一個充滿魅力嘅角色。

Photo from k.kbeom@IG

Photo from k.kbeom@IG

Photo from k.kbeom@IG

另外，同劇確定出演嘅仲有金明民、柳惠英及李姃垠。金明民飾演檢察官出身嘅刑法教授「楊鍾勳」，因為嚴格同毒舌嘅教學方式令學生聞風喪膽。柳惠英飾演貧窮學生「姜率」，因為接受資助而入讀尖子雲集嘅法律學院，喺入面感受到無盡嘅壓迫感同自愧感。李姃垠飾演法官出身嘅民法教授「金恩淑」，係一個唔鍾意權威同自由奔放嘅人，喺法庭上係調停達人，亦都係法律學院溝通同交流嘅標誌。

Photo from Pinterest

Photo from ryuniverse328@IG

Photo from Pinterest

劇集預計喺 2021 年上半年播出。製作團隊表示《Law School》係韓國國內最初以法律學院為背景，結合法庭同校園嘅電視劇。金明民、柳惠英、金汎及李姃垠將組成最強嘅法律學院軍團。

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）