黃秋生經典舞台劇《仲夏夜之夢》網上義播　收益將撥捐演藝校友會學生支援計劃

今年唔少演唱會、舞台劇及電影等都因為疫情關係而受到影響，而早前更吹起一陣網上睇 show 嘅習慣，唔少演唱會/舞台劇都喺網上限定時畀大家重溫，等大家就算喺屋企都可以除咗打機/煲劇之外，都可以有多一個娛樂選擇。而「神戲劇場」創辦人及擔任藝術總監嘅黃秋生近日就喺劇場嘅 Facebook 宣布將會喺網上進行義播，為一班演藝新力軍打打氣！

黃秋生喺 Facebook 中影片中指喺疫情下大家生活困難，而佢作為演藝一分子加上又係演藝校友會榮譽主席，對應屆畢業嘅同學「畢業即失業」及同業嘅情況感同身受，因而決定推行今次嘅義播計劃，為演藝圈出一分力，幫得幾多得幾多！

Photo from 神戲劇場

是次網上義播，佢哋就決定以莎士比亞最受觀眾喜愛嘅劇目之一《仲夏夜之夢》作為頭炮，播放期為 9 月 30 - 10 月20 日（即日起已可於網上訂票）。

Photo from 神戲劇場

票價則定為每張  $88 港元，另設有自訂票價選項，收益喺扣除基本開支後將全數撥予支持香港演藝學院校友會「2019-2020 年度學生支援計劃」用途。

而大家喺成功付費後會收到一組「演出播放連結」（每張網上錄播門票會有一組），每組「演出播放連結」只可於同一時間連接一個裝置（電腦、平板電腦或手提電話），並於48小時內可無限次重溫節目。

Photo from 神戲劇場

《仲夏夜之夢》故事講述四名年輕戀人為追求真愛，任性叛逆的逃到森林，上演一場熱血沸騰、大汗淋漓的愛情爭奪戰；森林裡，仙王仙后因互生妒忌而致四季失常，潮水氾濫，大小精靈落荒而逃；還有一群傻頭傻腦的業餘演員，努力排演一齣最開心的悲劇……

Photo from 神戲劇場

另外，原於今年8月由黃秋生、朱栢康及陳淑儀主演嘅舞台劇《ART呃》，將會延遲至 2021 年 8 月喺香港演藝學院歌劇院公演 8 場，有關演出訂票詳細則有待官方公布。

《仲夏夜之夢》
播放日期：2020年9月30日晚上8時至10月20日晚上11時59分
節目詳情：www.dctheatre.com.hk
預訂網上門票：ticketing.tbcstory.com/dctheatre

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）