韓劇取景地！孔劉同李敏鎬都去過　5 個粉絲遊韓必到打卡熱點

韓流當道，好多人都喺度追韓劇睇歐巴，睇李敏鎬同孔劉睇到心心眼嘅時候，會唔會想去歐巴們踏足過嘅地方影番張相呢？今次介紹 5 個韓劇取景地，等大家去韓國旅行嗰陣都可以去打番個卡，感受吓歐巴們留下嘅足跡～

駱山公園（낙산공원）
駱山公園係韓劇《屋塔房王世子》嘅取景地，位於首爾惠化站，公園設於山頂，平時都會有好多情侶同家庭去睇吓夜景，散吓步。駱山公園最有特色嘅相信就係包圍住公園嘅古城牆喇，就咁睇，好似穿越咗去古代咁。夜晚去嘅話步道兩邊會有微微嘅燈光照住，仲可以睇到首爾嘅夜景，真係好靚！

Photo from 《屋塔房王世子》

Photo from visitseoul

駱山公園（낙산공원）
地址：首爾特別市鐘路區東崇洞 山 2-10，駱山公園（서울특별시 종로구 동숭동 산 2-10，낙산공원）
交通方式：地鐵惠化站（혜화역）2 號出口步行約 10 分鐘

光化門廣場（광화문광장）
光化門廣場係首爾嘅地標之一，最著名嘅當然就係世宗大王像同李舜臣將軍像。呢度亦都係韓劇《The King：永遠的君主》嘅取景地。光化門廣場位於光化門站，正正就係喺光化門正前方，鄰近就係景福宮，去景福宮參觀完都可以嚟呢度行吓㗎～喺《The King：永遠的君主》入面李敏鎬同金高銀第一次邂逅就係喺呢度喇。

Photo from 韓國觀光公社

Photo from 韓國觀光公社

Photo from 《The King：永遠的君主》

光化門廣場（광화문광장）
交通方式：地鐵光化門站（광화문역）(設有至光化門廣場的地下連通道)

注文津防沙堤（주문진 방사제）
注文津防沙堤位於首爾近郊江陵，係韓劇《鬼怪》嘅取景地，《鬼怪》最經典嘅一幕就係喺呢度拍攝，當時金高銀吹熄蠟燭之後，孔劉就出現咗。劇集播出之後，呢度隨即成為咗打卡勝地，甚至到咗週末仲會有商販租借紅圍巾同花束畀遊客影相。

Photo from 韓國觀光公社

Photo from 《孤獨又燦爛的神--鬼怪》

注文津防沙堤（주문진 방사제）
交通方式：從首爾清涼里站（청량리역）搭火車到江陵（강릉），再從江陵搭 300 號市區巴士，「注文津中學校」（주문진중학교）落車，步行約 15 分鐘前往海邊

南山公園（남산공원）
南山公園係韓劇《梨泰院 Class》嘅取景地，位於首爾市中心嘅南山上，行完公園仲可以上埋 N Seoul Tower欣賞市景。除咗睇靚景之外，一到韓國櫻花季節，呢度仲係賞櫻嘅熱門地嚟添。《梨泰院 Class》大結局嘅場面就係喺呢度拍㗎喇，朴敘俊同金多美喺呢到演繹深情一吻～

Photo from 《梨泰院 Class》

Photo from google map

南山公園（남산공원）
地址：首爾市中區三一大路 231 （서울특별시 중구 삼일대로 231）
交通方式：地鐵會賢站（회현역） 4 號出口步行約 20 分鐘

良才川（양재천）
良才川位於首爾瑞草區，韓劇《她的私生活》就係喺呢度取景。呢度係韓國著名嘅賞櫻勝地，每逢櫻花季節，河川兩邊就會櫻花盛開，好似一條櫻花大道咁。《她的私生活》入面，朴敏英同金材昱就係喺呢度拍攝「假約會」嘅場景，好浪漫啊～

Photo from 《她的私生活》

Photo from visitseoul

良才川（양재천）
地址：首爾特別市瑞草區良才洞良才川永東 1 橋~永東 2 橋區間（서울특별시 서초구 양재동 양재천 영동 1 교~영동 2 교 구간）
交通方式：地鐵新盆塘線良才市民森林站（양재시민의숲역）1 或 2 號出口

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）