海洋公園「森度遊」$380包門票及一項體驗活動加現金券 園內露營體驗11月推出

海洋公園已於本月18日重開，10 月起仲會推出「森度遊」一系列活動，目的係為咗推動生態保育，展示南區優美嘅海岸線同大自然景致，同時都希望可以為香港人帶來留港度假體驗。

而海洋公園今日就公布咗「森度遊」活動門票價格，同時亦公布咗 11 月仲會推出園內露營體驗！都幾有創意喎！

Photo from 香港海洋公園

「森度遊」一系列活動包括可以喺水族館、北極館及人工湖等地方做瑜伽同冥想。喺水族館到做瑜伽真係一個幾特別嘅體驗，咁多海洋生物陪住你做瑜伽，心情都會平靜啲，好治癒啊～

Photo from 香港海洋公園

除咗做瑜伽，仲可以去南朗山行山，呢條山徑仲係首次對外開放添㗎！路線難度分兩級，到時仲會有導賞員介紹動植物。

Photo from 香港海洋公園

公園會喺指定日子舉辦活動，每人每節收費 80 元（唔包括入場門票）。不過樂園推出咗$380 元嘅活動套票，當中包括成人入場票 1 張、1 項瑜伽或行山體驗及園內 100 元電子現金券，小童套票就$220 元，感覺都幾抵玩，淨係張門票都已經值回票價～

至於 11 月就會推出園內露營體驗，可以喺「高峰樂園」體驗兩日一夜嘅露營。呢個露營並唔係一般嘅露營，因為可以歎住冷氣露營！

營地有四個配備咗冷氣嘅帳幕，每個最多容納四人，仲會提供沐浴同休息設施，參加者可以由上午 10 點開始住到第二日嘅上午 11 點半，期間仲可以夜探公園，同動物見面，仲有得 BBQ 添啊！

Photo from 香港海洋公園

有關園內露營活動嘅收費會喺 10 月下旬公布，不過園方指出，露營活動希望吸引家庭客，所以收費會低於$3000 元。歎住冷氣露營咁正，怕熱嘅朋友都可以參加喇！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）