大熱太空狼人殺《Among Us》手機版免費玩！4~10人連線 做任務搵入侵者

最近一款遊戲《Among Us》超級hit！玩法類似狼人殺，可以4至10人連線玩！既要做任務，又要搵出假冒船員嘅入侵者，有PC版同手機版，手機版仲係免費㗎！

《Among Us》其實係喺2018年推出，雖然唔係新遊戲，但係近嚟好多Youtuber都開始玩令到呢款遊戲事隔2年hit爆全球！

其實《Among Us》玩法類似狼人殺，係一款多人遊戲，可以畀4～10名玩家連線。以太空為主題，玩家分為船員（Crewmate）、入侵者（Impostor）兩大陣營。

玩法介紹：

每局會隨機選擇1~3名玩家做入侵者，其餘玩家則為船員。

船員負責喺地圖上有感嘆號嘅地方完成任務，例如重新佈線或幫發動機加油。每頂任務都係一種小遊戲。而入侵者就要假扮船員喺地圖上搞破壞，或者去除船員。

入侵者可以通過通風口（圖下紅框）穿梭於唔同嘅房間，而船員喺做任務嘅同時亦要留意周圍有無人行通風口。

船員發現同伴被入侵者除去後可即時報告（Report）進入討論環節，投票選出疑似入侵者嘅玩家踢出太空艙外，系統會公佈票出玩家嘅身份。遊戲中途玩家亦可以撳下地圖上的「緊急會議」（emergency meeting）嘅掣召開會議。

被入侵者去除嘅船員或被投票選出嘅疑似入侵者都會變成幽靈，以有限形式繼續喺地圖上活動，可以幫助你嘅隊友繼續任務。

遊戲內置文字聊天系統，只有仍然生存嘅玩家先可以喺會議期間交流，幽靈只可以同幽靈交流。

《Among Us》有PC版，不過需要付費，而手機版則係免費嘅，大家可以約埋一班friend一齊玩～

下載連結：

PC版 Steam（按此下載）

iOS版（按此下載）

Android版（按此下載）

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）