《Among Us》新手攻略！平民/內鬼玩法教學 地圖基礎流程指南

《Among Us》太空狼人殺大熱，不過因為未有中文版所以玩起嚟可能有啲困難。小編為大家整合「新手攻略」，船員、入侵者陣營要點做先可以獲勝？地圖上房間任務指南等！

基礎流程：

（按此：《Among Us》玩法介紹）

《Among Us》係一款多人遊戲，可以畀4～10名玩家連線。玩家分為船員（Crewmate）、入侵者（Impostor）兩大陣營。

4至10人連線，每局會隨機選擇1~3名玩家做入侵者，其餘玩家為船員。

《Among Us》有3種地圖，由於船員（Crewmate）、入侵者（Impostor）都需要喺地圖上不同地方做任務或搞破壞，所以大家最好要留意清楚地圖上每個房間嘅位置。

#船員（Crewmate）生存攻略

船員獲勝條件：

1. 完成所有任務（左上進度條達100%）

2. 捉到所有內鬼（入侵者）

首先要完成任務，由於有會即刻影響輸贏嘅緊急任務系列（包括氧氣室同反應爐），超時船員就會輸，所以一定要時刻留意情況，搵部分人去呢兩個地點附近巡邏，以免被入侵者破壞。

另外入侵者會把握機會清除落單嘅船員，所以盡量要集體行動，同時記住大家嘅行動軌跡，一有人出局，同佢同行嘅人嫌疑就最大。

雖然要睇地圖望下任務地點，但係唔好長開地圖，唔係好易畀入侵者消滅，又或者會錯過被消除嘅船員嘅身體。

由於入侵者可以通過通風口穿梭喺唔同房間，船員要留意下其他人嘅行動路線，睇下有無人利用通風口出入。

因為《Among Us》嘅角色多數係唔同顏色，所以可以記同你一齊做任務、路過嘅人係咩顏色，喺討論環節時盡可能推理出入侵者嘅身份。

#入侵者（Impostor）搞破壞教學

入侵者獲勝條件：

1. 破壞緊急系統（氧氣室、反應爐），分別限時30秒、45秒修復，超時船員即out

2.消滅所有船員

做內鬼最主要就係唔畀船員完成任務、清除所有船員，有兩種獲勝方法。

首先搞破壞唔一定要去到嗰間房，入侵者可以遠程破壞（例如閂門）咁就可以製造密室，幫助同伴輕易清除船員，只要撳一下地圖上相應嘅圖示就可以破壞嗰個系統。

破壞氧氣室、反應爐呢啲會直接影響輸贏，可以趁無人破壞佢，然後再閂門令船員趕唔到過去修復而出局。

另外有兩樣嘢破壞咗之後雖然唔會令船員即刻出局，但會嚴重阻礙佢哋做任務：電力系統同網絡系統。

停電會令船員嘅視野受阻，但入侵者就不變，可以更方便清除船員，又令到其他船員發現唔到出局同伴嘅身體。另外仲可以分散佢哋等船員去維修電力系統。

破壞WiFi可以中斷網絡，船員睇唔到cctv同admin監視器，方便入侵者行動清除船員，同時唔可以召開緊急會議，入侵者可以靠破壞wifi翻盤㗎！

#出局後幽靈要做嘅事

不論係被投票出局定被入侵者消滅，都會變成幽靈，為咗幫助仍活動嘅同伴，幽靈仍然要繼續做嘢，唔係人數越嚟越少同伴會好難贏。

注意幽靈做唔到緊急任務（氧氣室、反應爐），所以船員幽靈要幫手做其他任務，而入侵者幽靈就要幫手閂門阻止船員活動。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）