【日本必買】無印良品推邊爐湯底　7款口味輕鬆在家製作異國美食

因為疫症關係，唔少人都會選擇留喺屋企打邊爐。而日本嘅無印良品就推出咗唔同口味嘅邊爐湯底，7款湯底都係以唔同國家/地方嘅特色美食為基礎，等大家喺屋企都可以輕鬆食到異國佳餚！

Photo from MUJI

官方指一包湯底有 200g，大約係二至三人嘅份量，大家亦可以自行加入飯、麵等食材，豐富口感～

Photo from MUJI

1.四川麻辣邊爐湯底

睇相好似好紅好辣咁，因為呢款湯底正正參考咗四川嘅麻辣火鍋，所以入面加入咗八種香料，如辣椒、花椒、八角等。

Photo from MUJI

2.墨魚汁邊爐湯底

呢款湯底用墨魚汁做底，加入咗蝦、鯷魚等海鮮嘅味道，仲用上炸洋蔥、香草去調味，用啲汁嚟整 risotto 都好啱～

Photo from MUJI

3.印度咖喱雞邊爐湯底

呢款湯底加入咗 3 種蕃茄、腰果等味道，聞落就好似印度咖喱入面常見嘅香料－葫蘆巴葉咁，如果加埋雞肉落去一定好好食！

Photo from MUJI

4.法式海鮮湯邊爐湯底

呢款法式海鮮湯口味就加入咗蝦、蕃茄等味道，加埋啲芝士同飯落去又係一餐飯啦～

Photo from MUJI

5.日式擔擔麵邊爐湯底

呢款湯底就用咗日式擔擔麵嘅湯做底，包你食到芝麻香同豆瓣醬嘅味道！

Photo from MUJI

6.韓國人蔘雞湯邊爐湯底

睇圖就知呢款湯底以韓國嘅人蔘雞湯做基礎，入面會有雞肉同薑嘅味道。冬天嗰時加啲飯去餸實暖笠笠啫～

Photo from MUJI

7.泰國冬蔭公邊爐湯底

呢款冬蔭公湯底加入咗辣椒同綠檸檬嘅味道，食落去又酸又辣！打完邊爐仲可以加啲河粉落變做湯河添！

提提大家，湯包係唔包任何配料的。呢 7 款邊爐湯包依家只喺日本開賣緊，希望佢會盡快引入到香港啦，睇落真係好吸引呀～

無印良品湯底
重量：200g（2-3人份）
售價：¥290（約 HKD $21.3）

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）