【香港好去處】郊外打卡熱點！六大媲美外國嘅自然奇觀 被譽為「港版世外桃源」
Photo from Shutterstock
1.鶴咀－蟹洞（難易度：✦✦✧✧✧✧）
位於香港最南邊嘅鶴咀海岸保護區被人譽為「世外桃源」，因為佢靚到好似去咗外國咁樣呀！行去蟹洞嘅沿途都有好多好值得睇嘅古蹟/景點，例如香港歷史最悠久嘅「德己立角燈塔」同會發出巨大海浪聲嘅「雷音洞」等。雖然行去蟹洞有一段好長嘅路，但係沿途都多平路，又無咩長命斜，加上咁多靚景睇，對新手嚟講絕對係 CP 值極高～
交通：於筲箕灣地鐵站對出乘9號巴士至鶴咀站
2.菠蘿山－良田坳峽谷（難易度：✦✦✧✧✧✧）
菠蘿山又名「屯門後花園」，上山之後就會見到一個經過長期風化同侵蝕嘅大峽谷，就好似迷你嘅美國大峽谷咁樣！所以都有唔少龍友會專程上山影低呢個咁令人震攝嘅大自然景色！上山嘅路雖然幾斜，但就勝在夠闊落同無咩樓梯，啱晒新手慢慢行上山～唔好唔記得預啲時間落山到下白泥睇日落呀！
交通：乘 58M 或 258D 巴士至良景站
在 Instagram 查看這則貼文Haha其實行山都幾好呀雖然係攰 總算幾成功?兩個懶人去行山 ❤️☀️終於可以去下郊遊 #菠蘿山大峽谷
??? ?ℕ . ???? .（@nevaskaaa）分享的貼文 於 張貼
3. 斜炮頂－犀牛石（難易度：✦✦✦✧✧✧）
位於赤柱南部嘅斜炮頂有唔少受大自然風化嘅岩石，但要講到最特別嘅就莫過於犀牛石啦！想一訪犀牛石嘅朋友要注意！因為條路比較多碎石，有時需要手腳並用攀上山，加上路線比較隱蔽，所以新手記得搵埋有經驗嘅山友同行啦～
交通：乘 14 號巴士至赤柱炮台
4.大東山 －跳板石（難易度：✦✦✦✦✧✧）
大東山除咗芒草之外，其實有塊跳板石都好出名㗎！但放心～跳板石下面並唔係懸崖，而係一塊大石嚟！所以唔少山友都好鍾意單手攀上塊石到扮「跌落山崖」同扮 Laughing 哥咁邊聽電話聽攀石添～但因為路線比較多高低不一嘅石級，所以都好考大家體力㗎～
交通：於東涌站 B 出口附近乘搭 3M、11 或 23 號巴士至伯公坳，前行就係大東山入口
在 Instagram 查看這則貼文驚險行山記?? help !!! 。 。 。 。 。 。 。 。 。 唔好公審我呀? 睇睇留言就知真相? #大東山 #二東山 #跳板石 #伯公坳 #兄妹Hiking @chengdaniel
蜘蛛媽媽- 鄭麗莎 Lisa Cheng（@spider_lisa）分享的貼文 於 張貼
5.黃牛石城－石天窗（難易度：✦✦✦✦✦✧）
位於沙田東部嘅黃牛山上有個出名多風化石嘅黃牛石城，其中就以石天窗最為人知！但由於路線比較斜同多冼腳嘅沙石，有時需要手腳並用，加上往石天窗嘅路線並唔太清晰，所以大家記得搵埋有經驗嘅山友帶路呀～
交通：乘 49X 巴士至廣源總站，再沿小瀝源路上花心坑
6.黃竹角咀 －鬼手岩（難易度：✦✦✦✦✦✦）
位於新界東北嘅黃竹角咀有塊出晒名嘅岩石－鬼手岩！佢經過幾億年嘅風化同海水侵蝕就變成一塊「握緊拳頭」嘅岩石，真係好特別！但係要行山至鬼手岩就絕非易事，因為路線又斜又多碎石，仲要穿過唔少嘅樹林同荊棘先可以成功去到！所以新手睇下相就好啦，唔好亂咁挑戰呀！
交通：乘 20R 小巴至烏蛟騰站
提提大家，到郊外記得唔好掛住打卡，記得要衡量自己嘅體力同注意安全呀～
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
