UNO官方再澄清無連續+2功能牌玩法引熱討　玩家：規則應留畀玩家自訂

UNO 可以話係 Party 聚會必備嘅遊戲之一嚟，但大家玩咗依款 card game 咁多年，玩法又玩得啱唔啱呢？！最容易引起爭論嘅一定會牌中嘅功能卡「Draw 4」/「Draw 2」以及「功能牌可結束遊戲」等。繼去年 UNO 官方多次喺 Twitter 發文澄清正確規則後，近日佢又再澄清 Draw2 不可堆疊使用嘅玩法，不過一班玩家就好似唔多接受喎！

Photo from realUNOgame/Twitter

UNO 繼去年喺官方 Twitter 中表示「+4及+2功能牌不可堆疊使用」，並解釋正確玩法係當有玩家使用「Draw 4」或「Draw 2」功能牌時，下一位玩家就必需抽牌，而唔係連續堆疊加乘，令無法加乘嘅玩家抽取全部數量嘅牌。

不過當時就已經有網民表示唔會跟官方講法嚟玩，而會繼續按照自己習慣嘅玩法。

Photo from realUNOgame/Twitter

但近日，UNO 又再次喺官方 Twitter 澄清正確玩法，帖文中寫住「You cannot STACK  a +2 on a +2」（你不能於 +2 的功能牌上再加上＋2 功能牌）。

Photo from realUNOgame/Twitter

即係指玩家喺被 Draw2 後唔可以再出 Draw2 牌，將要抽牌嘅責任推卸畀下一個玩家，被 Draw2 嘅玩家只能抽牌。

帖文一出隨即引起網民討論，不過大部分人都唔認同依個玩法，仲話其實大家都知正確玩法係咩，只係大家已經習慣咗，而唔會想改。

Photo from realUNOgame/Twitter

有網友更認為 UNO 官方唔需要太認真，並表示規則應該留給玩家自己訂添！

Photo from realUNOgame/Twitter

其實大家玩咗 UNO 咁多年，唔多唔少都已經習慣可以堆疊加乘嘅玩法，一時間都要大家改變又真係幾難嘅。不過點都好喇，玩遊戲啫，何必太認真，玩嘅過程開心唔係最重要咩！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）