最後下海玩水機會！香港獨木舟/直立板/浮潛熱門地推介 唔玩就要等多半年喇～
秋高氣爽，唔少人都會選擇行山或露營，但除咗依啲活動之外，亦有部分人會選擇喺依個有涼爽嘅天氣抓緊夏天嘅尾巴，出海玩！而喺香港除咗可以約朋友租船出海之外，仲有唔少好玩嘅水上活動，如獨木舟、直立板以及浮潛等！今次就整合咗 4 個熱點攻略畀大家～
1. 大嶼山浪高長岸
浪高長岸係一間位於大嶼山嘅水上活動度假中心嚟，中心內提供咗風帆、滑浪風帆、風箏滑浪、衝浪板、印第安獨木舟等設施。冇裝備或者初學者都唔使擔心，中心內設有水上活動用品店及由專人指導嘅水上活動課程，令大家可以安心享受其中樂趣。
而除咗各項水活動外，浪高長岸仲有提供各種大小營地租住服務：度假屋、南非野營屋、燒烤、派對場地。無論係一家大細、三五好友或拍拖睇日出/日落都喺一個唔錯嘅選擇。
地址：
大嶼山長沙下村29號
交通：
東涌巴士總站乘坐 11、23、A35 號巴士，車程約25分鐘
中環碼頭至梅窩，後轉乘 1、2、A35或 4 號巴士於長沙下村海灘下車，車程約 15 分鐘
2. 南丫島西沙水上活動中心
西沙水上活動中心位於南丫島模達灣，中心內提供各種水上活動，包括滑水、獨木舟、水上單車、香蕉船、碰碰船、電動浮板等等，應有盡有，非常適合一家大小一齊玩！
地址：
南丫島模達灣 7 號
交通：
於香港仔碼頭（鄰近香港仔海濱公園內「珍寶海鮮舫」接駁船碼頭）乘搭街渡，船程約 23 分鐘。
注:平日每60至90分鐘一班，星期日及公眾假期每45至60分鐘一班。
3. Blue Sky Sports Club 藍天體育會
位於西貢嘅Blue Sky Sports Club 藍天體育會提供各項水上運動課程，當中以直立板及透明獨木舟最受歡迎。另外，佢哋仲有海上歷險之旅以及生態遊，喺轉業人士嘅領導下，喺大小島嶼、岩石峭壁中穿梭。
地址：
西貢大網仔路斬竹灣村 17B
交通：
西貢巴士總站乘坐 94 號巴士於黃竹灣站下車，再步行約 3 分鐘即到，車程約 20 分鐘。
4. 西貢海下灣
一講到西貢海下，相信大家都一定唔會陌生，海下灣位於西貢西郊野公園北端，水質清澈，係香港首批海岸公園之一嚟，公園內設有珊瑚保護區，棲息咗唔同種類嘅珊瑚及魚類，有啲仲係熟稀品種嚟添。
每年依度都係唔少人特意嚟租借獨木舟，直立板，或浮潛工具嘅地方，適合一家人或朋友一起嚟玩。
另外，喺今年年底位於西貢西郊野公園內嘅海下遊客中心亦會正式開放畀公眾參觀，遊客中心內有多用途室同一片大草坪，大家以後去海下玩就可以喺草地上野餐或閒坐喇！
交通：
西貢市中心乘搭 7 號小巴前往海下
注: 星期一至六每 30 分鐘一班，星期日每 20 分鐘一班，而由海下開出尾班小巴為下午 6:45
提提大家，水上活動涉及一定風險，參加者需要自行承擔風險，於活動前亦有可能須簽署免責聲明。
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
