F4 時隔 7 年合體！四子將同框登內地節目

《流星花園》相信係唔少人嘅童年同青春，嚟緊終於有機會回憶青春啦！因為 F4 終於合體啦！

早前江蘇衛視宣布 F4 將於 10 月 30 日喺《一千零一夜》節目中合體獻唱，仲上傳咗四人嘅宣傳影片，令粉絲非常激動！今次都係 F4 時隔 7 年再次合體，對上一次係 2013 年江蘇衛視嘅春晚。

Photo from 江蘇衛視@微博

Photo from 江蘇衛視@微博

F4 當年憑住《流星花園》爆紅，而《流星花園》都成為咗唔少人嘅青春，《流星雨》一曲深受歡迎，絕對係經典金曲。可惜最後組合解散收場，令粉絲相當遺憾。

Photo from 《2013江蘇衛視春晚》

解散後四人係各自嘅領域繼續發展，言承旭係戲劇方面發展唔錯，主演多套電視劇，如《就想賴著你》、《我的燦爛人生》及《我好喜歡你》等。

Photo from 言承旭 Jerry@微博

周渝民同樣喺戲劇方面發展，憑《痞子英雄》再度爆紅，仲同同劇演員喻虹淵於 2015 年結婚，誕下女兒。

Photo from 周渝民@微博

吳建豪就歌壇影視雙發展，出演電視劇《拜金女王》、《錦繡未央》及電影《葉問 4》等，同時都係內地節目《這就是街舞》第二季嘅隊長。感情方面吳建豪同交往多年嘅新加坡棕櫚油千金石貞善結婚，可惜最後離婚收場。

Photo from VanNess 吳建豪@微博

朱孝天主要都係喺戲劇方面發展，出演電視劇《英雄》、《美夢成真》及《華麗上班族》等，2016 年同內地女星韓雯雯結婚。

Photo from 朱孝天@微博

今次 F4 合體，相信會喚起唔少人嘅回憶，見到佢哋應該腦入面就有聲：「陪你去看流星雨落在這地球上～」

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）