何雁詩自爆婚前夢到同初戀男友結婚！鄭俊弘唔介意做「6億駙馬」

鄭俊弘同何雁詩即將結婚，日前何雁詩上電台時談到婚禮，表示婚前發夢夢見嫁咗畀初戀男友。對於未婚夫獲封「6億駙馬」，佢指鄭俊弘無為此唔開心，又話自己唔清楚爸爸身家有幾多。

鄭俊弘（Fred）同何雁詩宣佈結婚後一直高調晒恩愛，佢哋fans仲落埋巴士廣告，二人即將完婚，佢哋差唔多去到邊都會被問到結婚嘅事。

日前何雁詩上電台宣傳新歌，再被問及婚禮同即將結婚心情。佢就話佢同未婚夫鄭俊弘都唔算太過緊張，反而身邊姊妹仲緊張過佢哋。

何雁詩又自爆自己「出軌」，發夢夢到同初戀男友結婚：「好彩起身見到Fred喺隔籬即刻放心晒！」

提到爸爸喺內地有多間公司，喺香港持有3個價值超過$6,000萬物業，身家估計最少有$6億，何雁詩指自己唔太清楚爸爸嘅身家有幾多，大部分婚禮開支都係兩個新人自己畀，不過就承認爸爸有幫手。

而有個有米嘅未來外父，鄭俊弘獲封「6億駙馬」，何雁詩表示：「我哋都睇得好化，最緊要同屋企人關係好。」

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）