【MeWe懶人包】「新Facebook」成香港最熱門App！ 3步開戶教學！繁體中文介面快將推出

近日唔少人都聽到身邊朋友話要離開 Facebook 轉投最近大熱嘅社交平台 MeWe。但可惜 MeWe 目前只要有英文介面，令唔少用開中文介面想轉會嘅人十五十六。不過遲嘅就唔使再心思思想嚟想去，事關早前 MeWe 就喺 Twitter 回覆網友指繁體中文介面會喺數星期內推出呀！

其實 MeWe 係一個早喺 8 年前 (即 2012 年) 就已經成立嘅社交平台，但礙於同 Facebook 類近而一直受到壓迫令知名度不高。直到今年，因美國大選時， Facebook 嘅審查言論和無故封鎖帳號令唔少人反感，從而令一直被受打壓嘅 MeWe 喺一夜間有千萬個 Facebook 用戶搬家轉會，最近更成為香港最熱門App添！

啱啱都提過，MeWe 嘅操作方式同 Facebook 好類似，但最大嘅不同之處係網站創辦人兼行政總裁 Mark Weinstein 曾經強調 MeWe 嘅 3 大唔會之事：絕對唔會賣廣告、唔會出售用戶資料以及唔會為咗廣告收入而降低發佈商嘅貼文接觸量。而網站嘅營運資金全靠高淨值客戶投資及用戶付費訂閱，因此唔會存在政治偏頗。

講到依度大家一定會問咁係咪一定要畀付費先用得㗎？！答案係： NO！

大家簡單開設帳號後，就可以免費使用基本功能，而開設帳號係完全免費嘅。但如果你想開設專頁或使用更多進階嘅功能，就要支付訂閱費，而進階功能包括佈景主題、無限下載貼圖、 100GB MeWe 雲端儲存以及免費視像通話等，至於費用目前嚟睇就需要 HKD$38 一個月，首次使用更可免費試用30日，不過大家係可以隨時取消嘅！

簡單 3 步開設帳號：

1. CLICK 入 MEWE 下載及註冊 （LINK）
2. 設定用戶名稱及密碼，並同意條款
3. 通過郵箱/電話驗證身分

註：用戶名稱係會公開顯示並且設定後係唔可以更改！（所以認真要三思呀！）

開咗帳號，當然要 add 番啲朋友同 join Group 喇！大家只要喺頁面中 click 「Invite Your Friends to Join」就可以按自己需要嘅方式邀請朋友加你好友或者以 email 方式邀請。

而 join Group ，佢哋嘅 Group 清楚分類，令大家可以直接按分類揀選出有興趣嘅專頁加入。

但一點大家必須注意，iOS版、Android版同網頁版嘅 MeWe 喺功能上係有少少差別。例如 iOS 版暫時未有置頂訊息／帖子嘅功能，聊天室中亦未可以引用訊息回覆，但 Android 同網頁版就已經可以使用 。

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）