2021 年 7 套必追韓劇　宋仲基、孔劉、全智賢等巨星回歸

By Ella on 01 Dec 2020

Digital Content Writer

2020 年韓劇有好多話題之作，好似《愛的迫降》、《夫婦的世界》及《雖然是精神病但沒關係》等，而 2021 年相信都會有好多受歡迎嘅韓劇，因為宋仲基、孔劉、朱智勛及全智賢等巨星將一同回歸！今次就為大家推薦 7 套 2021年必追嘅韓劇！

《智異山》朱智勛、全智賢
《智異山》由朱智勛、全智賢主演，除咗演員陣容強勁，幕後班底都不容忽視，劇本由《屍戰朝鮮》、《Signal》嘅編劇金銀姬執筆，導演李應福曾執導《鬼怪》、《太陽的後裔》，劇集製作費更高達 320 億韓幣，絕對係「重金打造」！故事以韓國智異山國立公園為背景，講述新人護林員「姜賢祖」（朱智勛飾）可以睇到因山難罹難嘅鬼魂，佢將聯手前輩「徐伊江」（全智賢飾）解開智異山嘅秘密。

Photo from _jujihoon@IG

Photo from 《藍色海洋的傳說》

《寂靜的大海》孔劉、裴斗娜
《寂靜的大海》由孔劉、裴斗娜及李準主演，影帝鄭雨盛擔任製作人，係一套科幻懸疑驚悚劇集，改編自同名短篇電影。故事以未來世界為背景，講述地球因為沙漠化而令人類缺水缺糧，孔劉飾演嘅航天局隊長帶領太空人精英到地球以外嘅地方尋找拯救人類嘅辦法。劇集以未來世界為題材夠晒新穎，而且仲有男神孔劉加持，相信一定會引起熱潮。

Photo from doonabae@IG

《機智醫生生活 2 》曹政奭、柳演錫、鄭敬淏
《機智醫生生活》第一季大獲好評，劇集以醫院為背景，故事圍繞住五個醫生好友之間嘅友情，以及喺醫院發生嘅一啲溫馨故事。而第二季中，醫大同期「五人幫」曹政奭、柳演錫、鄭敬淏、田美都及金大明將於 2021 年全員回歸！

Photo from tvN

《Vincenzo》宋仲基、玉澤演
《Vincenzo》由宋仲基、玉澤演及全汝彬主演。故事講述小時候被領養到意大利，大個成為黑手黨顧問律師嘅「Vincenzo Cassano」（宋仲基飾）因為內部鬥爭而返韓國，遇上女律師「洪車英」（全汝彬飾），兩人聯手合作，用「以惡制惡」嘅方式去伸張正義。而玉澤演喺劇中飾演誠實單純、充滿熱情嘅實習律師。兩大男神同框，相信一定睇到女粉絲們心心眼～

Photo from HiSTORY D&C

Photo from taecyeonokay@IG

《屍戰朝鮮：雅信傳》全智賢、朴秉恩
《屍戰朝鮮》大受歡迎，而喺第二季中全智賢更於劇集尾聲中短暫露面，為劇集留下懸念。今次嘅特別篇《屍戰朝鮮：雅信傳》將由全智賢及朴秉恩主演，故事以全智賢飾演嘅北方族女子雅信為中心，將揭開生死草嘅終極秘密。

Photo from C-JeS Entertainment

《Undercover》韓素希、安普賢
《Undercover》由韓素希、安普賢主演，韓素希憑《夫婦的世界》爆紅，安普賢亦憑《梨泰院 Class》打開知名度。《Undercover》係一套為父報仇嘅復仇劇，故事講述女主角係販毒集團大佬嘅女兒，為咗查明父親死因而進入警隊，成為「臥底警察」。今次係韓素希首次擔正做女主角，仲同安普賢有對手戲，令人非常期待！

Photo from xeesoxee@IG

Photo from bohyunahn@IG

《雪滴花》丁海寅、Jisoo
《雪滴花》由丁海寅及 Blackpink 成員 Jisoo 主演。故事以 1987 年嘅首爾為背景，講述女大學生「殷英初」（Jisoo 飾）某日遇上成身血闖入女生宿舍嘅大學高材生「林秀浩」（丁海寅飾），「殷英初」冒住險留低「林秀浩」並幫佢治療，兩人譜出一場動盪時局下嘅愛情故事。今次係 Jisoo 第一次擔正做女主角，搭檔「國民年下男」丁海寅，相信粉絲們一定非常期待。