【麥玲玲2021生肖運程】率先預測牛年12生肖運程：羊、猴、雞
之前就同大家講咗牛、虎、兔、龍、蛇、馬依 6 個生肖，今次繼續搵嚟著名堪輿學家麥玲玲師傅同大家講牛年 12 生肖中羊、猴、雞嘅運程，等大家可以有時間做足準備。
12生肖運運程：肖牛｜肖虎｜肖兔｜肖羊｜肖猴｜肖雞｜肖龍｜肖蛇｜肖馬｜肖狗｜肖豬｜肖鼠
羊：
沖太歲
吉星：地解
凶星：歲破、大耗、難竿、月煞
屬羊嘅朋友，嚟到牛年要有心理準備喺 12 生肖中係變化最多，因為係沖太歲，依個係今年不穩定嘅元素嚟。沖太歲嘅年份，最好就有喜事沖喜吓喇，包括住結婚、添丁、買樓，如果有三大喜事，咁就有問題。但如果冇以上嘅打算呢？！今年係比較辛苦啲年份。
今年只有地解星，地解係代表住搬遷，如果今年搬屋/裝修，無論你願意定唔願意，今年都會面對住依個環境嘅，但有郁動都係好嘅。
另外今年有歲破，歲破係代表住人際關係嘅破壞，得罪一啲緊要嘅人，所以講嘢小心啲，做人做事低調啲就安全啲喇！另外大耗係大嘅破財星；難竿係困難重重；月煞係女性帶嚟嘅麻煩，今年都係唔好投資保守啲好啲喇！最好就係佗一個豬加兔仔嘅飾物 ，咁就自然好好多喇！
猴：
吉星：天喜、紫微、龍德
凶星：暴敗
屬猴嘅朋友恭喜你呀！因為 12 生肖之中喺牛年你係數一數二咁好，今年有天喜星，天喜代表住喜事重重，結婚又得、買樓又得、添丁又得！今年仲有紫微同埋龍德，係強而有力嘅貴人星嚟嘅。天喜都係桃花星嚟，結咗婚嘅朋友唔好對人太熱情，如果唔係好容易引發三角關係。
另外，如果未打算添丁嘅朋友，今年亦都要小心喎！好容易因為有喜而要結婚，咁要自己計劃得好啲喇！有紫微同龍德照住，原則上做嘢係相當之順利嘅，無論事業運又或者財運都有進步嘅空間。
要小心嘅就有暴敗星，暴敗依個星代表住「三更窮五更富」，同埋上落比較大，所以做生意嘅朋友記得積谷防飢，而投資嘅朋友記得見好記收，咁今年就會安全好多喇！
雞：
吉星：將星、祿動
凶星：天解、白虎、浮沉
屬雞嘅朋友嚟到牛年相當唔錯，因為雞同牛本身都係半合嘅生肖，係好朋友嚟～當同太歲係好朋友，做嘢自然就順遂啲喇！所以今年都有幾多新嘅合作機會嘅，不過就唔建議投資太多，保守少少，刀仔鋸大樹就最好喇！
今年都有吉星照住有將星、祿動星，將星係代表住領導才能嘅星，有依個星係特別有利一啲從事紀律部隊嘅朋友，例如：警察、消防、海關，咁今年可以話係步步高陞。而祿動星係代表住以前嘅朝廷俸祿，所以升職加人工係無問題嘅。
天解係一半凶半吉嘅星嚟，代表先難後易，今年畀多少少耐性喇。白虎依個凶星係好惡嘅女仔呀！今年遇到嘅人都係脾氣唔好嘅，而浮沉係一個游水比較危險嘅星，記住結伴同游小心啲喇！
下次同大家講埋最後 3 個！
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
