全新片尾登場～《鬼滅之刃》特別版動畫《柱合會議．蝶屋敷篇》 下周日本首播！

日本人氣動畫《鬼滅之刃》自開播以嚟一直贏得廣大人氣，故事中包括咗人鬼間嘅悲痛故事以及驚心動魄嘅劍戰，再穿插滑稽場景，動畫唔止喺日本爆紅，仲成功掀起全城熱追潮，可以話係人氣爆棚！而粉絲們嚟緊又有好消息喇～早前官方 ufotable 就宣布推出特別版動畫《柱合會議．蝶屋敷篇》，大家又點可以錯過呀！

早前上映《鬼滅之刃》嘅動畫電影《鬼滅之刃劇場版無限列車篇》，除咗打破港、日、台三地票房紀錄外，仲喺 2020 年 Google 10 大熱搜電影排行榜中排名第三添！而近日官方 ufotable 又帶嚟好消息，指喺嚟緊嘅 12 月 20 日將會推出特別版動畫《柱合會議．蝶屋敷篇》。

《柱合會議．蝶屋敷篇》將會以動畫版第一季中嘅第 22 集至 26 集為基礎，講述炭治郎等人喺蝶屋敷養傷及進行修煉嘅同時，九柱同主公喺蝶屋敷展開嘅柱合會議嘅故事，而特別版後嘅故事亦將會銜接到《鬼滅之刃劇場版無限列車篇》。

即特別版可以話係第一季動畫同《鬼滅之刃劇場版無限列車篇》電影之同所發生嘅小故事嚟。

而今次官方亦為特別版動畫帶嚟全新海報同片尾曲添～

特別版動畫《柱合會議．蝶屋敷篇》將於 12 月 20 日晚上 6 點 59 分至 9 點 14 分（日本時間）喺日本富士電視台播出。

各位《鬼滅之刃》粉絲記得唔好錯過喇！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）