【2021請假攻略】最長可請 7 日連放 16 日假！打工仔必睇～

話咁快 12 月已經過咗一半，大家今年都因為疫情關係冇得出去旅行，所以唔少人都將本來今年旅行計劃推遲咗，希望 2021 年可以實行。不過雖然未知出年實唔實行到，但睇定 2021 年公眾假期時間表，計劃吓啲假點放好，都唔錯呀！今次就幫大家整理咗一個「請假攻略」，畀大家有足夠時候計劃旅行大計～

今年一共有 17 日公眾假期，除咗 8 月同 11 月之外，基本上每個月都是有假放！但對星期六/日唔使返工嘅打工仔嚟講，其實只有 14 日公眾假期，事關 2021 年嘅公眾假期中有 4 日係喺星期六嚟，所以出年去旅行嘅話，最長可以請 7 日連放 16 日假！

睇吓 2021 年度假期分布先，再同大家講吓請假攻略喇！

Photo from Presslogic

請假攻略：

。2020年12月至2021年1月：請 4 放 10

由 2020 年嘅聖誕節開始計，今年嘅聖誕節係喺星期五，而 2021 年元旦亦喺星期五，所以只要請中間 4 日，就可以能將兩個星期五連埋一齊放，由 12 月 25 日開始放到 2021 年 1 月 3 日，連放 10 日呀！！

。2月：請 4 放 10

2021 年嘅農曆年初一至初四係 2 月 12 日至 15 日（星期五至星期一），所以如果無論喺請新年前嘅 4 日（8 至 11 日）定之後嘅  4 日（16 至 19 日）都可以放到 10 日假，而如果你嘅公司假比較多，仲可以一次請晒 8 日，咁就可以一次連放 16 日喇！

。3 至 4 月：請 3 放 10／請 4 放 10

嚴格嚟講，3月本身喺冇公眾假期嘅！但出年因為4月2日係受難節，而且 3 月 27、28 日都係星期六、日嚟，所以如果請 3 月 29 日至 4 月 1 日，就可以連放 10 日。

另外，大家亦可以選擇只請 4 月 7 至 9 日（3 日），同樣可以放連放10日！夾埋兩邊一齊放，仲可以一次連放 16 日添，爽呀！

。5月：請 2 放 5

今年嘅佛誕假期喺 5 月 19 日星期三，啱啱就喺一個星期嘅中間，所以對打工仔而言，無論係請 17、18日（星期一、二）定20、21日（星期四、五），一樣可以連埋星期六日一齊連放 5 日！

。6月：請 1 放 4

2021 年嘅端午節喺 6 月 14 日（星期一），大家只需要喺前 6 月 11 日（星期五）請假，咁就可以放足 4 日喇！

。7月：請 1 放 4

因為 7 月 1 日係星期四嘅關係，所以只要請星期五 1 日就可以自製 4 日連假喇～

。9月：請 2 放 5/請 4 放 9

只要請 9 月 20 - 21 日或 23 - 24日，是但兩日或  4 日請晒，再加埋 22 日嘅中秋節假同前後嘅星期六、日一齊放，就可以放足 5 日或 一次過連放 9 日。

。10月：請 1 放 4

今年嘅重陽節假定喺 10 月 14 日（星期四），大家只要好似之前 7 月咁，請星期五 1 日就可以連埋星期六、日一齊連放 4 日！

。12月：請 4 放 9

雖然出年嘅聖誕節（12 月 25 日）同元旦（1 月 1 日）都喺星期六，不過因為有 12 月 27 日（星期一）聖誕後補假，所以大家只要請星期二至五（12 月 28 至 31 日）就可以有 9 日假期，同另一半歡度佳節！

雖然正在嘅公眾假期唔算多，但只要大家好好利用都可以自製唔少長假期㗎！深明大家都想長假，所以記得早啲 Mark 定喇！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）