盤點 10 大最唔想收到聖誕禮物　被評為冇誠意/敷衍/唔等使之選！你又送/收過邊幾樣？

仲有唔夠 10 日就到聖誕節啦！相信大家都為聖誕節同朋友交換禮物作最後準備，但仲未諗到買咩好都建議大家唔好隨便買呀，以免事後畀人指禮物冇誠意、敷衍或唔等使等。而台灣網站 DaliyView 就公布咗「最不想收到的聖誕禮物」調查，一齊睇吓大家準備好嘅禮物有冇上榜喇！

台灣網站 DaliyView 早前公布咗一款「最不想收到的聖誕禮物」調查，一眾網民選出曾經收到過嘅唔等使/冇誠意禮物。

第 20 位：安全套；第 19 位：護唇膏；第 18 位：相架；第 17 位：沖涼用品（沐浴組/香皂）；第 16 位：拼圖；第 15 位：年曆/行事曆/月曆；第 14 位：筆記本；第 13 位：抱枕；第 12 位：擺飾；第 11 位：銀包。

第 10 位：手套
亞洲嘅天氣向來都唔係話人人都好需要有戴手套嘅必要，但唔少人屋企總會有一兩對手套備用，但如果收到唔太啱自己風格嘅，都真係唔知用唔用好喇！

第 9 位：襪
襪都算係交換禮物常見嘅物品嚟，唔論款式、大小與花色，唔少人都認為「誠意不足」，但如果收到唔啱 size 嘅，都真係唔知嬲好定笑好～

Photo from 襪

第 8 位：面膜
面膜可以話係男女都啱用，但每個人嘅膚質唔同，就算送嘅係知名品牌，都可能會出現過敏嘅情況，所以除非你同對方非常非常熟悉，如果唔係最好都係唔好挑選面膜喇！

第 7 位：香水
無論男女都會用到香水，但香味嘅嘢完全係睇個人喜好，你鍾意嘅對方未必一定都鍾意～此外，男性同女性對香水產品亦有唔同，所以同面膜一樣，除非你好熟悉對方，否則都係唔好揀香水作為交換禮物！

第 6 位：護手霜
護手霜係唔少人嘅送禮首選之一嚟，價錢唔貴，一次有幾支，仲好實用。但有網友就指如果唔止一個人送畀你時，真係會一個冬天都擦唔完。

Photo from 護手霜

第 5 位：圍巾
頸巾同手套一樣，就咁睇就好似係唔錯嘅禮物嚟。但網友就表示近年冬天唔算太凍，而且屋企已經有唔少頸巾，根本用唔晒，所以大家今年都係唔好送頸巾好啲～

第 4 位：紙巾
紙巾相信大家每日都一定會用到，可算係非常實際嘅用品嚟，而且喺韓國慶祝人哋新居入伙都會送上紙巾，對大家嚟講依個完全唔覺得係「禮物」嚟，而且當你著到靚靚參加完 party 後，拎住整條紙巾咁大體積嘅禮物都幾唔方便！

第 3 位：毛公仔
唔少人認為送公仔給女仔一定冇死，但原來係錯㗎。網友認為太大嘅毛公仔唔止「阻埞」，仲好容易引起敏感，最後公仔嘅下場可能都係捐出去或轉贈畀其他人。

第 2 位：杯
相信大家對「杯」會上榜一啲都唔會意外，但冇諗過佢竟然唔係第一位。而點解會上榜相信唔使講大家都心中有數，所以真係真係唔好再送杯喇！

第 1 位：糖果、餅乾
第一位竟然係...糖果餅乾等零食類，對小朋友嚟講，糖果餅乾作為禮物應該係唔錯嘅，但對大人嚟講就真係好似敷衍咗啲喎，而且又唔係人人都鍾意食零食，加上如果失手買咗對方唔鍾意嘅零食，就真係好只會垃圾桶見。所以零食類都係留畀自己食好啲。

唔知大家嘅禮物有冇上榜呢！不過送禮物畀人最緊要都係心意，相信送禮嘅人都係精心挑選，所以唔好收到唔啱用嘅禮物時就責怪對方呀！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）