抗疫聖誕做乜好？5 大家居推薦節目

疫情之下，今個聖誕節應該都好難出去慶祝，不過留喺屋企唔知做咩好？今次推介 5 個家居節目，等大家可以在家抗疫過聖誕！

睇戲

喺屋企最開心就梗係煲劇啦～雖然依家冇得去戲院睇戲，不過都可以一家人一齊喺屋企睇戲。聖誕節就當然要睇吓聖誕應節電影啦，Netflix 除咗有好多好似《聖誕怪傑》呢類嘅經典電影之外，仲有好多近年嘅聖誕電影好似《節日限定之戀》、《兜亂公主闖情關》等，有浪漫、親子、搞笑，非常適合一家人一齊睇。

延伸閱讀：《10 套聖誕必睇應節電影》

Photo from Netflix

Photo from Netflix

家居運動

疫情之下，好多人都開始喺屋企做運動，好似家居健身、瑜珈咁，始終運動可以強身健體，咁先可以加強身體免疫力對抗病菌。一家人喺屋企最好就係做啲靜態少少嘅運動，例如瑜珈，唔會太激烈之餘，大人小朋友都做得，絕對係合家歡家居運動。依家 YouTube 度有咁多教學片，一邊睇一邊學，非常方便。

Photo from Coffee林芊妤@YouTube

遊戲

一家大細喺屋企最適合就係玩遊戲，有好多益智趣味嘅 Board game 都好適合大人細路玩，最傳統嘅當然就有 UNO、大富翁等經典遊戲。除咗 Board game 之外，電子遊戲當然唔少得啦～以下呢幾款 Switch game 都好適合一家人玩㗎。

《世界遊戲大全51》
Switch 化身為棋盤，玩家可以玩來自世界各地多達 51 種嘅經典遊戲，例如波子棋、黑白棋及圍棋等。

Photo from Nintendo

《體感嘉年華》
《體感嘉年華》集合咗各種老少咸宜嘅小遊戲，例如投籃機、無人機飛行競賽及保齡球等。

Photo from Nintendo

《Go Vacation™》
《Go Vacation™》集合咗共 50 種以上對戰或協力遊戲，例如潛水、騎馬、沙灘排球等，玩家要喺各種遊戲中爭取最好成績。

Photo from Nintendo

《運動派對》
玩家可以盡情暢玩水上摩托車、高爾夫球、滑板及沙灘排球等遊戲，挑戰屋企人，喺遊戲中爭取好成績。

Photo from Nintendo

《Moving Out》
玩家要穿梭大街小巷，進行搬家工作，除咗個人形式之外，仲可以選擇同屋企人一齊玩，一齊克服重重關卡。

Photo from Nintendo

煮飯仔

聖誕大餐絕對係聖誕節一定要有嘅嘢，今年聖誕節冇得出去食，一於自己煮，一家人喺屋企，一齊分工合作整聖誕大餐，零舍開心。大家平時返工返學都好忙，好多人愈來愈少花時間陪屋企人，今次在家抗疫過聖誕，其實都係一個機會可以畀大家陪吓屋企人。由買材料到一齊落手煮，一家人有傾有講，時間過得快之餘，仲非常充實。

Photo from Pinterest

砌模型、拼圖

模型、拼圖雖然可以一個人砌，不過如果買一啲大嘅拼圖或模型，就可能需要幾個人一齊分工合作完成。砌拼圖、模型可以打發時間之餘，一家人仲可以有商有量，研究點樣砌，作品完成之後仲可以用嚟做擺設～

Photo from LEGO

Photo from LEGO

有咁多節目，今個聖誕節在家抗疫就唔怕悶啦～

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）