除咗隔住Mon倒數仲可以咁玩！5 款唔使面對面玩連線就玩得嘅 party game 推介

仲有幾日 2020 年就離去，相信每年大家都會約埋三五好友齊齊開 party 倒數，可惜今年疫情持續，早前政府延長限聚令至 2021 年 1 月 6 日，所以今年嘅除夕元旦，大家如果想同朋友一齊迎接 2021 就只可以靠 FaceTime/Zoom 依啲軟件相見！但齋傾偈等倒數又會覺得無聊，依個時候一啲可以同朋友隔空玩嘅 party game就大派用場喇！

今次整理咗 5 款就算同朋友隔住個 Mon 都可以隔空玩餐飽嘅 Party Game 推薦畀大家！

1. 《Among Us》（人數： 4 至 10 人）

《Among Us》係一款以太空為主題玩法就同狼人殺差唔多嘅遊戲嚟，玩家可以 4 至 10 人一組連線玩！遊戲中玩家做任務之餘，仲要搵出假冒船員嘅入侵者嘅遊戲，所以又被稱為「太空狼人殺」！

大家只要喺手機、電腦或 Switch 下載遊戲就可以連線一齊玩！

詳細玩法攻略： LINK

2. 猜猜畫畫（人數：不限）

玩法好簡單，大家只需要準備紙筆或可以利用 Zoom 中嘅畫板功能，先按「分享畫面」打開畫板，畀所有人共同使用，然後大家輪流/選定一人作為畫家，畫出題目，猜嘅人可以喺畫家一邊畫畫時一邊估，最快估中嘅人就會得一分，但如果喺畫完後限定時間內（自定）都冇人估中，就當畫家得分。

3. 收買佬（人數：不限）

大家喺參與嘅人當中選出一位當主持人（即遊戲主角：收買佬）出題，而其他玩家就需要喺指定嘅時間內喺屋企搵出指定嘅物品，喺鏡頭前展示，最快完成嘅人會得分。

4. 估歌仔（人數：不限）

大家記唔記得以前 TVB 嘅綜藝節目《超級無敵獎門人》中嘅估歌仔環節，玩法用節目差唔多，只不過今次演唱嘅人就唔係外國人，而係自己嘅朋友，演唱者可以隨機選出大家熟悉嘅歌曲唱出歌詞，讓大家猜出歌名。估中最多嘅人係贏家。

5. 狼人殺（人數：不限）

玩法同平時一樣，不過由於人數不同，身份卡牌嘅數量會按參與人數嘅唔同作調整。建議主持人平均安排遊戲中各個角色嘅人數。

主持人可以先告知每位玩家嘅號碼方便稱呼，再以私下留言嘅方式告知個別玩家嘅身份及功能。之後就可以開始遊的，玩家可以透過視像觀察其他人嘅表情同演技，而如果用 ZOOM 玩嘅大家仲可能偷偷地放大畫面嚟觀察對方，最後發起投票搵出狼人。

當然玩遊戲就一定會有輸贏，喺遊戲結束後，要咩罰輸嘅人或贏嘅人會有咩獎就睇大家決定喇！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）