具惠善直言自己戀愛時非常忠誠　網民毒舌：以後仲邊有人敢同你一齊

By Ella on 30 Dec 2020

Digital Content Writer

具惠善喺網絡節目《FACE ID》中測試自己嘅 MBTI 類型，一邊測試一邊談及自己嘅感情觀，直言自己戀愛時非常忠誠，引來網民毒舌。

2019 年具惠善喺社交平台大爆安宰賢不是，更指安宰賢出軌，引起軒然大波，昔日恩愛夫妻撕破臉，離婚收場，安宰賢形象大跌，直至依家都未有復出幕前，而具惠善最近就開始復出。

Photo from kookoo900@IG

Photo from aagbanjh@IG

早前具惠善喺網絡節目《FACE ID》中測試自己嘅 MBTI 類型，同時都大談自己嘅情史及戀愛觀。具惠善表示自己初戀係 20 歲嗰陣：「係第一次愛人，以為嗰份感情會到永遠，但係感情其實冇永遠」，同時都坦言自己交過好多男朋友，而且都係圈內人：「並唔係對呢個職業嘅人感興趣，而係自己身處喺呢個環境，不得不跟圈內人交往」。具惠善仲表示：「唔會因為人哋鍾意我而同人交往，一定要係我鍾意先得。」

Photo from 카카오TV@YouTube

最後具惠善測試結果係 INTJ 類型（內傾、直覺、思考、判斷），INTJ 係十六種人格類型中最稀有嘅類型之一。INTJ 類型嘅人唔鍾意購物，具惠善非常同意仲表示自己一到春天就會一次過買晒一年嘅衫，一年內著完就會扔掉，而佢解釋話因為自己唔會成日同人見面，所以可以咁樣做。具惠善表示：「一年見一次已經係經常見，一個月見一次已經係愛人」，仲話成日見真係好攰。另外 INTJ 類型嘅人喺一段關係中係非常忠誠，具惠善都話自己係呢類人，戀愛時從來唔會背叛對方，非常忠誠。

Photo from 카카오TV@YouTube

另外，具惠善話自己唔係一個浪漫嘅人，佢唔鍾意人哋送花畀佢，覺得係啲冇用嘅嘢，仲講笑話講多謝之餘仲會問多句「可唔可以畀埋個膠袋我扔掉紮花」，佢表示只係講笑，都希望段關係可以容忍到呢啲玩笑。可惜具惠善表示自己遇到嘅男仔都唔可以咁樣開玩笑，反而係搞到自己整喊人哋咁，仲要問返佢「做咩又喊啊」，對方就會覺得我依家已經喊緊，你仲咁樣講嘢，而通常呢啲時候都唔會講到啲咩好聽嘅說話，最後具惠善更笑言自己係「惡魔」。