《Among Us》「內鬼」走入現實生活？！要搵依隻船員公敵曲奇只能靠味覺？

《Among Us》依隻遊戲風靡全球！就算已經過咗幾個月，佢嘅魅力仍舊不減，單計 Steam 平台有幾萬人同時上線絕對唔係咩難事！先前我哋都為大家介紹過《Among Us》嘅玩法，教咗大家點樣先可以喺遊戲入面勝出，但大家有冇幻想過，原來除咗遊戲入面會有「內鬼」（Impostor），喺現實世界大家都可能會中佢哋招呢？

Photo from Among Us Official Twitter

喺《Among Us》嘅世界入面，雖然全部人都一模一樣，但總有一個，甚至幾個會係披住羊皮嘅狼，喺度詐傻扮懵，然後乘機跣你一鑊！早前喺外國就有一個叫 heysiouxz 嘅實況主整咗啲曲奇，雖然佢哋塊塊都好靚，又同《Among Us》入面嘅角色一模一樣，但其實佢哋入面有塊係加咗辣椒整㗎！

Photo from loserpoint@imgur

heysiouxz 話本身佢係想喺網上買曲奇模返嚟自己整，但由於佢實在係太遲先有依個邪惡大計啦！根本就等唔切到貨，所以最後佢一手一腳自己用鉗整個模出嚟！除咗要注意整得個模好唔好睇之外，仲要小心會唔會好鋒利或者太割手，今次整依堆曲奇真係少啲耐性都唔得呀！

Photo from loserpoint@imgur

heysiouxz 就同大家分享：佢整普通曲奇同辣曲奇係用緊同一個配方㗎！但喺辣嘅曲奇度，佢將早就磨好咗嘅哈瓦那辣椒放咗落牛油度⋯⋯哇！哈瓦那辣椒係世界上最辣嘅辣椒之一，辣度可以有成 35 萬度！係朝天椒辣度嘅 13 倍咁多！不過 heysiouxz 就叫大家放心：唔會辣死嘅～佢一隻辣椒平均分畀 6 塊曲奇咁話喎。

Photo from loserpoint@imgur

雖然依度塊塊都咁靚，但其實佢都有失敗過㗎！佢就畀咗幾個忠告大家：一、唔好徒手整；二、要等佢哋凍哂先好上糖霜；三、要由深到淺咁開始上色。睇完 heysiouxz 嘅曲奇，唔知大家又會唔會心思思想整一個自己嘅版本出嚟呢？

Photo from loserpoint@imgur

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）