新版《十月初五的月光》主角造型曝光！直認演初哥哥/祝君好有壓力

TVB宣佈翻拍《十月初五的月光》，胡鴻鈞飾演「初哥哥」、港姐亞軍何依婷飾演「祝君好」、羅天宇演「司徒禮信」。早前新劇試造型，兩位主角「初哥哥」、「祝君好」造型復古，胡鴻鈞同何依婷接受訪問時都表示有壓力！

TVB開拍新版《十月初五的月光》，日前主演名單終於落實，以全新班底再次演釋呢套經典電視劇。

張智霖飾演嘅「初哥哥」、佘詩曼飾演嘅女主角「祝君好」、馬浚偉飾演嘅「司徒禮信」，呢3個角色分別由胡鴻鈞、何依婷、羅天宇出演。

原來新版《十月初五的月光》仲會有兩位老戲骨石修同米雪出演！早前胡鴻鈞、何依婷兩位主角就齊齊出席新劇試造型。

「初哥哥」同「祝君好」造型超復古！「初哥哥」六四分界髮型、「君好」則係瀏海長卷髮。同原版有所不同，原版「初哥哥」頭髮剪得好短，而「君好」就係留短髮嘅。

飾演男女主角嘅胡鴻鈞同何依婷都同樣表示感到有壓力，胡鴻鈞就話好緊張，要演初哥哥覺得好有挑戰性，更要上堂學手語。

而何依婷則表示知道自己會做「君好」呢個角色感到好開心，亦好多謝公司同監製咁大膽揀佢，並表示佢會努力演出。

而石修同米雪就表示喺出演前做足功課！米雪更直接向有演原版嘅家燕姐取經！

即睇片段：

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）