《萬千星輝2020》陳豪全場唯一戴醫用口罩！堅持拒用透明口罩獲讚防疫意識高

《萬千星輝頒獎典禮2020》上全場藝人都戴上透明口罩，唯獨陳豪堅持戴醫用外科口罩！佢早喺台慶已經戴醫療口罩，更直言寧願犧牲樣貌換安全，為保妻兒健康同大眾著想。獲讚防疫意識高！

《萬千星輝頒獎典禮2020》得獎名單出爐，王浩信再奪視帝感謝Yoyo時，陳自瑤表情成為全晚話題，當晚仲有一件事值得大家留意。

陳豪亦有份角逐視帝，不過佢唔算大熱，但仍然成為焦點，全因佢係全場唯一一個藝員堅持戴醫用口罩！

喺頒獎禮開始前，馮盈盈有特登提到大台採取嘅防疫措施，指全部藝人都會戴上透明口罩，不過其實呢款透明口罩並唔夠貼面，防護性唔算高。

陳豪由行紅地氈開始就已經係戴醫用口罩，到頒獎禮時，不論開場定坐喺台下都全程戴住外科口罩，防疫意識極高！

上月台慶陳豪都有戴醫用口罩，佢當時表示擔心安全問題，寧願犧牲樣貌換嚟安全，又指自己戴口罩唔單單為自己，亦係為保妻兒健康同大眾著想，因為一個中（新冠肺炎）嘅話就會連帶爆落去，呼籲大家唔好掉以輕心。

陳豪無懼他人目光，堅持戴口罩保護自己、保護他人，呢種意識值得肯定！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）