韓國「紅薯夫婦」 鄭容和徐玄被指IG傳情　情侶Bucket List仲有一件事未完成？

韓國戀愛假想節目《我們結婚了》雖然已經停播咗一段時間，但因為出演嘉賓同節目情節深刻，一直喺粉絲心中留下深刻印象，係唔少人嘅青春回憶。而當年其中一對「紅薯夫婦」CNBLUE 鄭容和同少女時代徐玄就深受唔少粉絲喜愛，最近容和更喺 Instagram 上發文，令到唔少鍾意「紅薯夫婦」嘅網民都非常興奮，再度陷入依對夫妻嘅粉紅泡泡之中。

Photo from 《我們結婚了》

《我們結婚了》係一套戀愛假想真人騷節目，2008 年起到 2017 年先至停播，廣受粉絲歡迎。其中，受到唔少粉絲喜愛嘅「紅薯夫婦」近日再度被提起！起因係容和喺 Instagram 上面 Post 咗一張紅薯嘅照片，撰文寫住「你 …. 產生了感情..... 你 ..」令唔少粉絲都即刻聯想到：莫非係講緊由佢同埋少女時代徐玄所組成嘅「紅薯夫婦」？！

Photo from 鄭容和 Official Instagram

一眾網民當堂好興奮去尋找任何蛛絲馬跡，希望自己鍾愛嘅「紅薯夫婦」其實係真嘅！並且發現容和發文後約 12 小時，徐玄都有喺 Instagram「回應」到容和嘅 Post！網民指出：藍色係容和嘅應援色，而徐玄係好少用依隻色嘅心心！但係當男方入伍嘅前一日、相識十周年以及最近嘅回應入面都用咗依隻色嘅心心。不禁令唔少網民喺度猜測：唔通「紅薯夫婦」係真嘅？

Photo from 徐玄 Official Instagram

喺由「紅薯夫婦」出演嘅《我們結婚了》入面，當時兩個人寫低咗待辦清單，但去到節目完結之際其實佢哋有一件事係未完成嘅，就係「一齊去聖母百花聖殿」。當時依件事係由容和寫低，出自一本叫《冷靜與熱情之間》嘅書入面，而書中其實係男主角約定女主角喺佢 30 歲生日當天一齊去嗰度見面，而徐玄今年就咁啱係 30 歲啊！

Photo from 《我們結婚了》

無論「紅薯夫婦」係真係假，最後會唔會修成正果，其實都係畀咗一個好好嘅回憶一眾粉絲，亦都帶咗一首好好聽嘅「平語歌」畀粉絲，希望佢哋兩個都可以繼續喺演藝事業上再創高峰，並且過得好似睇「紅薯夫婦」嘅觀眾一樣咁幸福快樂啦～

Photo from 鄭容和 Official Instagram

Photo from 徐玄 Official Instagram

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）