【綠領行動回收利是封計劃】利是封循環再用♻️　為環保出分力！回收前必睇注意事項～

By Celia on 15 Feb 2021

Digital Editor

世界很大，生命很短，做自己就好！

今日已經係初四喇！打工一族聽日又係放長假後開工嘅日子，雖然唔知大家今年嘅農曆新年有冇出門去拜年逗利是，不過相信大家點都會收到一兩封「利是」嘅，而「利是」嘅重點都係入面個餡，咁大家喺拆完利是之後，個利是封唔知大家又個點處理呢？！環保團體綠領行動每年喺農曆新年過後，都會喺全港設置收集箱，俾大家拎利是封嚟回收再用～

今年就同大家請嚟綠領行動嘅助理項目經理 Man Yip 同大家介紹吓依個咁有意義嘅項目喇！

問：「利是封回收重用大行動」的概念是？

其實綠領行動發起依個「利是封回收重用大行動」都有超過 10 年嘅時間，當初只係細規模地同某啲公司一齊合作去做。我哋就純粹當係一般廢紙回收咁處理，但後期我哋發現原來回收返嚟嘅利是封嘅質素仲係好好，事關好多市民都會用完啲利是封就掉咗佢，因為封利是主要都係入面個餡，個利是封大家都唔會要，所以慢慢我哋就諗有冇啲方法可以令到佢用多幾年呢？所以最後就加入重用依個元素喺入面。

而我哋嘅重用做法就係，喺農曆新年之後，將收集箱放喺唔同嘅地方，收集大家唔要嘅利是封；之後，我哋就會經過庇護工場嘅處理，再由社福機構嘅學員幫手重新包裝，再經篩選之後就會變成新生利是封。每個新生利是封後面都會有一個貼紙以作識別。

一般我哋都會將利是封分成大封、中封同細封嚟包裝，經過大概一整年嘅時間整理之後，就會喺下一年嘅農曆新年前將新生利是封再派返畀街坊去用。

問：現時市面上部分利是封會用上特別圖案或形狀，喺處理上會唔會要特別處理或者係無法回收呢？

回收尺寸基本上冇限制，但如果有啲特別古靈精怪嘅形狀，就盡可能小心處理。

問：「利是封回收重用大行動」今年已踏入第12年，活動上有甚麼改進的地方？市民在參與程度上有甚麼改變？

正如之前所講，一開始我哋只係廢紙回收，但喺過程中就發現好多利是封都好新，所以慢慢我哋個方向就變咗係鼓勵街坊重用。而近年我哋都發現都多咗市民願意去使用新生利是封，當我哋派發嘅時候，雖然都會有啲市民會話「吓，用過㗎，咁我唔要喇」之類，但唔少都會覺得冇問題，年輕一輩嘅家長會比較願意接受，甚至有啲小朋友會覺得好好呀，有啲唔同嘅款可以畀佢揀吓，就唔係全部都一式一樣。

問：回收後會整箱咁交畀學員處理？

一般嘅做法就係會向參加嘅機構提供一個收集箱，例如放喺商場中畀市民拎去回收，而到活動完結收走個箱時，我哋就會連埋回收箱同入面嘅利是封一次過收走，再分別運到多間庇護工場處理，所以咁多年嚟大概都總共收咗超過 5 千 5 百萬個利是封。

問：大家可以將利是封拎去邊回收？會有指定回收時間？

一般會建議市民拎去指定回收箱，位置方面，農曆新年之後可以睇番官網（LINK）同 Mewe Page 專頁（Link）公布嘅地點去回收。

而今年嘅收集日期就會喺 2 月 18 日至 3 月 3 日。一般大概就會初七之後，預市民開始拆利是、有利是封就會公布收集點。

問：全年都可以交畀你哋？

只會喺指定時間回收利是封。但當然，每年都有好多市民好熱心，喺過咗收集時間都可能會有利是封想回收，不過其實中心就無辦法回收嘅，因為中心係無辦法處理，所以我哋都會集中喺嗰段時間收集完之後一次過運去工場。

問：所有利是封都可以回收？

大部分都可以，但如果大家都知道有啲可能唔適合重用嘅，大家就可以選擇唔放入收集箱中，從而減輕篩選嘅時間，如：姓氏、有年份、生肖、有摺痕、釘過、有錄音功能、印有個人相片或者有自動粘貼口嗰啲，就唔係咁適合重用嘅。

問：今年嘅活動有冇同之前有冇咩大分別？

自上年開始去到今年依段時間，其實大家都將個注意力放咗喺疫情方面，而我哋睇番一啲外國嘅建議，其實就算病者接觸過啲利是封，病菌可能依附咗喺個利是封表面，但只要將收到嘅利是封存放一段時間之後，等病菌冇咁活躍甚至完全消失後先進行處理。

問：今年有部分人就指因為疫情而決定唔會到親友屋企拜年，依個情況吓會唔會對活動有影響？

其實都會有影響，例如有啲公司一直以嚟都好支持，但今年因為疫情佢哋都估計市民係會少咗出街，甚至有啲舖頭可能已經全線停業或者更改咗營業時間，變咗唔方便回收嘅情況，但係我哋又覺得農曆新年都係大家一個緊張嘅節日嚟，就算可能大家留喺屋企嘅話點都會有父母畀小朋友嘅壓歲錢，所以用封利是都少不免嘅。

當然我哋都建議大家唔好太著重物質之上，應更著重喺心意上，因為可能買咗一啲賀年嘅禮盒畀長者，但其實佢哋未必啱用，咁反而可能簡單陪佢哋一齊食餐飯或者一齊去吓一啲地方玩吓，嚟取代一啲真係實質物質嘅禮品會唔會更好呢？！

問：總括嚟講，活動最困難的地方是？

其實最大嘅困難就係市民好勇躍，咁多年以來收到超過 5 千 5 百萬個利是封，所以我哋希望收到返嚟嘅利是封都可以派得返出去畀市民重用。因為好多市民就會覺得，回收咗啲利是封就已經好好，所以開頭幾年就係我哋不停會收到好多，但我哋派唔出去，而近幾年因為市民開始願意去接受，因此我哋收咗返嚟處理完之後，都可以派到出去。