保暖包重用秘笈！三種實用功能令人意想不到

最近氣溫咁低，凍到個人手腳凍冰冰，如果有個保暖包拎吓，暖笠笠就已經好幸福。雖然保暖包為我哋帶嚟咗溫暖，但其實佢係好唔環保嘅產品嚟，而且就算唔再暖都仲好有用！如果你手上嘅保暖包已經唔再暖，不妨試吓再利用佢？

Photo from KAKAO FRIENDS STORE

保暖包最主要嘅成份係鐵粉，入面仲有鹽、活性碳同蛭石等等嘅元素。當打開包裝嘅時候，鐵粉同空氣中嘅水份接觸，從而氧化，繼而發熱，帶畀用家溫暖。

但因為鐵粉係金屬，丟棄後會對環境構成污染。更甚嘅係，如果保暖包未氧化完就被人丟棄，佢會持續發熱，有爆開甚至引起火警嘅風險，成為一個隱形嘅炸彈。

Photo from KAKAO FRIENDS STORE

保暖包雖然為我哋喺寒冬之中嘅生活帶嚟便利，但亦會引伸出好多問題，所以大家不妨考慮唔好即刻丟棄已用完嘅保暖包，而將佢加以利用，用盡佢嘅全部價值。

第一、防潮。保暖包中嘅鐵粉、活性碳，同埋蛭石都具有防潮嘅效果。香港潮濕嘅日子較多，相信都令唔少人非常頭痕。我哋可以嘗試將用完嘅保暖包放入衣櫃入面，幫手降低濕度，用盡保暖包嘅功效。

Photo from Pinterest

第二、除臭。保暖包入面嘅活性碳可以達到除臭嘅效果。我哋可以選擇直接將用完嘅保暖包放入鞋窿入面，或者剪開，倒入細盤再放入鞋櫃，兩種方法都可以達到除臭嘅效果。

Photo from Pinterest

第三、園藝。保暖包當中嘅成份可以為土壤帶嚟營養。蛭石有保水同透氣嘅效果，可以為土壤帶嚟營養，加上鐵粉可以幫泥土補充鐵質，相信可以幫大家屋企啲盆栽茁莊成長！

Photo from Pinterest

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）