《蠟筆小新》致敬《愛的迫降》　小愛小新重演降落傘邂逅一幕

由玄彬、孫藝真主演嘅韓劇《愛的迫降》係上年嘅神劇，而兩人成為今年嘅「元旦情侶」，令劇集再次受到關注，不過似乎呢股熱潮燒到去日本，因為喺《蠟筆小新》入面竟然出現《愛的迫降》嘅經典橋段！

玄彬與孫藝真喺 1 月 1 日被韓媒爆出正在熱戀，其後兩人承認戀情，孫藝真更罕有地喺 IG 發文甜蜜回應，兩人成為 2021 年嘅「元旦情侶」，而《愛的迫降》就成為咗兩人嘅定情作，再次受到關注。

Photo from yejinhand@IG

Photo from yejinhand@IG

《愛的迫降》熱潮蔓延全亞洲，日本當然都唔例外，不過似乎連《蠟筆小新》嘅編劇都係劇迷，因為喺《蠟筆小新》近期嘅一集中竟然出現《愛的迫降》嘅經典橋段，呢個經典橋段就係令人非常心動嘅「降落傘邂逅」！

喺《愛的迫降》中「尹世理」（孫藝真 飾）因為玩降落傘時遇上意外而誤墮北韓，遇上北韓軍官「利政赫」（玄彬 飾），兩人展開一段浪漫嘅南北韓禁忌之戀，而「降落傘邂逅」呢一幕亦成為劇集嘅名場面。

Photo from 《愛的迫降》

Photo from 《愛的迫降》

Photo from 《愛的迫降》

喺《蠟筆小新》中「小愛的迫降」一集中就重演咗呢一幕「降落傘邂逅」，千金小姐小愛因為唔想去上密密麻麻嘅補習班而逃走，按一個掣就將安全座椅變成降落傘，連人帶椅飛走，不過途中卻遇上大風而跌落樹上被困，後來被小新及正男遇見，小新接住咗從樹上跌下嘅小愛，上演咗一場英雄救美嘅戲碼，小新瞬間變成「利政赫」，小愛就變咗「尹世理」，致敬《愛的迫降》。

Photo from 《蠟筆小新》

Photo from 《蠟筆小新》

Photo from 《蠟筆小新》

喺日本動畫度睇到韓劇情節真係好神奇，唔少韓國網民都覺得非常有趣，大讚搞笑之餘又好可愛～

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）