日本「數秘術」生日占卜測 2021 戀愛運程　邊個數字最大機會遇上命中注定嘅人？

2021 年嚟到，相信好多人都會好奇自己新一年嘅運程，單身嘅朋友應該都好想知自己幾時可以出 Pool，最近日本就有一個叫「數秘術」嘅占卜，用生日日期就可以測到今年嘅戀愛運程，大家快啲試吓啦～

日本媒體《Emo!miu》發表咗占卜師 AZ 嘅文章，提及用「數秘術」占卜 2021 上半年嘅戀愛運程，只需要計算自己嘅生日日期總和，得出嘅數字就係結果，幫自己測之餘，如果有暗戀對象都可以幫佢測埋，順便睇吓點樣先可以成功攻陷對方！

Photo from yejinhand@IG

占卜嘅計算方法好簡單，只需要將自己嘅西曆生日所有數字加埋一齊，直至個答案變成單位數就得，不過如果個答案係 11、22、33 嘅話，就唔需要再加，可以直接做結果。

例如：1994 年 1 月 19 日
1+9+9+4+1+1+9=34
3+4=7（7 就係結果）

#數字 1

你係一個以自己思想生活嘅人，係領導者類型，2021 年上半年可能係通過改變與親人嘅關係嚟改變生活方式嘅時候。你有自己嘅一套婚姻觀念，唔會因為其他人點講而改變，不過喺 3 月嘅時候可能會有所變化，或者會遇上一個注定要改變你嘅人～

如果對象係數字 1：佢有啲自我中心，唔擅長婉轉地表達，如果想關係更進一步，可能你需要直接地表達自己嘅感覺，通過誠實、直接嘅交流可能會有意外收穫！

#數字 2

你係一個有精緻藝術感嘅人，喺上半年將會係你創建自己世界嘅時候，例如喺社交平台發文、Post 相都係以你自己嘅視角出發，而喺呢個網上世界，話唔定你會遇到一個同你有相同價值觀嘅人。

如果對象係數字 2：佢都係一個精緻、純淨嘅人，唔擅長同好多人同時相處，鍾意同有相同興趣嘅人交流。可以嘗試同對方一齊討論吓電影、書籍，分享下彼此嘅價值觀。

Photo from actorleeminho@IG

#數字 3

開朗嘅氣氛製造者，或者好怕羞嘅人，你係兩者中其中一種。你唔擅長表達自己嘅真實感受，但如果喺上半年勇敢表達自己嘅話，有機會提升自己嘅金錢運及工作運。亦可以通過改變髮型及打扮自己嚟增加結識異性嘅機會。

如果對象係數字 3：佢係一個鍾意玩，好有精力嘅男孩，今年佢將會遇到大突破，你需要喺佢身邊支持、鼓勵佢。

#數字 4

你係一個非常真誠嘅人，同你相處會令人覺得放鬆，你畀人一種安穩嘅感覺。喺呢一年，你會覺得自己嘅思想同環境發生變化，對你而言係充滿挑戰嘅一年，只要捱過挑戰就可以重新建立自己。而喺感情方面，要清理一下一啲唔想交往嘅曖昧關係。

如果對象係數字 4：佢係一個堅定安穩嘅人，不過今年可能會遇上一啲改變，而佢並唔擅長去面對呢啲變化，佢需要一個令佢可以放心嘅人，你只需要向佢伸出手，陪佢渡過一切就可以了。

Photo from jxxvvxxk@IG

#數字 5

你係一個充滿自由精神嘅人，鍾意挑戰，可以靈活地接受任何變化及成長，喺今年可能會有巨大嘅飛躍，會有好多未知嘅嘢發生，而 4 月可能會有一個好大嘅改變。今年可能會遇到可以幫助你自由生活嘅人。

如果對象係數字 5：佢係一個反復無常嘅人，經常改變狀態，今年係佢發揮本領嘅時候，佢鍾意改變，所以你都要跟上佢嘅步伐。

#數字 6

你係一個好有愛心嘅人，受到朋友嘅信任。今年係令你靈魂成長嘅一年，有好大機會會遇上命中注定嘅人，可能會同對方成為愛人、朋友或者靈魂伴侶。

如果對象係數字 6：佢係一個深情、紳士、善良嘅人，佢今年正在尋找真愛，對於命運注定嘅人，佢會竭盡所能捉住，如果你唔想錯過佢，就要畀佢知道你對佢嘅感覺。

Photo from yejinhand@IG

#數字 7

你按照自己嘅節奏生活，活喺自己嘅世界，你畀人一種神秘嘅感覺，非常有吸引力。不過喺今年你要嘗試誠實地表達自己，挑戰新事物，戀愛運都會因此而提升。

如果對象係數字 7：佢係一個難以捉摸嘅人，你唔知道佢諗緊咩，佢經常需要時間自己獨處。你可以抱住開放嘅心態面對佢，約佢食飯行街，慢慢了解吓。

#數字 8

你係一個堅定、勤奮嘅人，喺愛情及工作中都會盡自己所能。喺今年，你嘅生活或工作會有所改變，而喺愛情方面，你今年可能會突然想結婚，想建立一段穩定嘅關係。

如果對象係數字 8：佢係一個好努力嘅人，不過喺今年，佢似乎會改變自己嘅工作及生活模式，以及改變一啲自己嘅「規矩」，對愛情嘅諗法都會有所唔同，甚至可能同上年嘅佢有 180 度轉變。

Photo from jongsuk0206@IG

#數字 9

你非常有同理心，你可以客觀冷靜地看待事情並下判斷，今年係可以擴大自己世界嘅一年，會發生好大變化，不過記住要跟隨自己嘅感覺行事，無論係戀愛或工作都係。

如果對象係數字 9：佢係一個善良、寬容、溫柔嘅人，對佢而言，今年將會係不一樣嘅一年，係充滿挑戰嘅一年，你可能會見到佢新嘅一面。

#數字 11

你非常細膩，直覺非常敏銳，喺 2021 年你會變得更加敏銳，如果有對象嘅話，感情可能會動搖，如果相處上覺得有問題，就要誠實面對自己嘅感受，同朋友分享吓自己嘅感受對你會有所幫助。

如果對象係數字 11：佢係一個非常細膩嘅紳士，善於觀察，不過容易受傷。喺 2021 年，你哋之間嘅感情可能會動搖，佢可能會對你若即若離，你要保持鎮定，唔好被佢影響。

Photo from hyunah_aa@IG

#數字 22

你係一個努力實現夢想嘅人，但你都會因為要協調身邊嘅人而壓制自己嘅真實慾望，喺新一年唔好再勉強自己，唔好再妥協、克制，要毫不猶豫地去實現自己嘅理想，如果有鍾意嘅人，就勇敢追求啦～

如果對象係數字 22：佢係一個有上進心、有風度、受人尊敬嘅人，佢好有理想，佢會喺今年努力實現理想，佢需要你嘅打氣，你需要喺背後默默支持佢。

#數字 33

你係一個天真爛漫嘅人但同時都懂得察言觀色，喺新一年，你要直接地表達自己嘅諗法， 通過表達自己，你可以同鍾意嘅人保持聯繫，而人際關係方面都會產生變化，令你更輕鬆。

如果對象係數字 33：佢對周圍嘅人都好友善，好受歡迎，但佢唔擅長做決定及表達愛意，不妨嘗試問佢「你喜歡怎樣的人」、「你真的想這樣嗎」，可能你會得到一個意外嘅答案。

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）