前 Super Junior 成員金起範首談退團原因　合體金希澈展現兄弟情

By Ella on 22 Jan 2021

Digital Content Writer

前 Super Junior 成員金起範退團多年，早前開設 YouTube 頻道，仲請咗 Super Junior 成員金希澈，兩人激罕合體，引起網民熱議，金起範仲首度談及當年退團原因！

Super Junior 2005 年出道，2008 年開始金起範唔再參與團隊嘅任何活動，專注向戲劇方面發展，2015 年與 SM 娛樂公司合約期滿，正式退出 Super Junior。雖然喺 2008 年至 2015 年期間，由於合約問題金起範都仲算係 SJ 嘅成員，但由於唔參與團隊活動，所以一直都冇同其他成員合體過，變相當時已經退團。

Photo from mub_ik_mik@IG

不過金起範同隊內嘅成員金希澈一直都有保持聯絡，甚至喺希澈嘅提議下開設咗 YouTube 頻道「양반 김기범 Yangban Kim Ki Bum」，希澈仲幫手剪片，可見二人兄弟情不變！

Photo from kimheenim@IG

而喺最新上傳嘅短片中，金起範同金希澈仲激罕合體，一邊飲酒，一邊談心，起範更首度談及當年退團嘅原因。

Photo from 양반 김기범 Yangban Kim Ki Bum@YouTube

喺短片中，希澈扮起主持人嘅角色，問起範：「你當年係咪遭到 Super Junior 成員嘅排擠？點解退團？」起範回答：「係我自己提出退團，因為想集中於演戲方面。」希澈再問到對於成員嘅回憶係好定壞時，起範就話有好有壞，希澈就笑言真係好誠實，然後補充話「壞嘅回憶就係成員當年經常鬧交，鬧完之後和好，和好之後又再鬧過」，起範都表示同意，話冇啲咩特別唔好嘅回憶。

Photo from 양반 김기범 Yangban Kim Ki Bum@YouTube

除咗談及退團原因，希澈都透露自己有講起範嘅近況畀李秀滿知，亦轉述返李秀滿嘅說話畀起範聽，李秀滿問起範「過得好唔好？過得好就好了」，對起範依然非常溫暖，仲講起以前發掘起範嘅經過，原來當年李秀滿喺係父親住嘅屋苑停車場第一次見到金起範，於是發掘咗佢做練習生，李秀滿仲話呢啲都係好重要嘅事，所以一直記得。希澈之後搞笑話呢個就係自己一直同公司續約嘅原因，因為李秀滿老師所做嘅行為都令佢好感動。