宵夜最佳拍檔！韓國人最愛公仔麵Top 5，連少女時代太妍都係fans？

韓潮吹到咁熱，連帶韓國食品都大受歡迎！每次睇韓劇見到男女主角，宵夜一定食公仔麵，仲要用銅鍋嚟煮，拎住個煲蓋食，幾有風味～～韓國公仔麵偏硬身有彈性，容易吸收湯汁。咁你知唔知韓國人最鍾意食乜野牌子嘅麵呢？小編就例出Top 5俾大家參考下，有機會一定要試哂佢！

1. 三養辣雞炒麵

Photo from samyangfood

號稱韓國最辣公仔麵你又試過未呢？一推出即刻吸引好多網友去試，都大讚夠哂辣，辣得好過癮～～出名到世界各地嘅YouTuber拍片挑戰，連Eh Bee Family最近都一齊挑戰！三養辣麵唔會得個辣字，仲好香炒麵味，所以會令你不斷想繼續食食食，食到鼻水汗水流哂出嚟～～

Photo from samyangfood

鍾意辣嘅朋友一定要試下！平時話食得辣嘅，好可能俾佢打敗啊！（笑）

2. 辛辣麵

Photo from Nongshim

辛辣麵可以話係韓國公仔麵代表，係好早期引入香港嘅韓國牌子，全因湯底做得恰到好處，咸咸辣辣，會令人飲到上癮呀！麵質較厚有彈性，一啲都唔會淋，唔使加乜野餸，簡單打隻蛋落去已經夠正啦！

Photo from Nongshim

原來仲有泡菜味，除咗辣，仲多咗陣泡菜酸味，酸酸辣辣，都非常吸引呀！

3. 安城湯麵

Photo from Nongshim

又係農心嘅產品啊！跟據南韓京畿道安城市生產嘅一種傳統湯料去製造，加入咗幾種香料，咸中帶微辣，辣度比較輕微，係唔食辣嘅朋友都容易入口呀！公仔麵就係較難形容係乜野味道，好似出前一丁就是出前一丁嘅味～～

Photo from Nongshim

反正安城湯麵係少女時代成員太妍最愛嘅公仔麵，仲曾經係綜藝節目即場示範如何煮出完美嘅公仔麵！

4. 炸王炸醬麵

Photo from Nongshim

睇韓劇成日見到主角叫外賣，好多時都食炸醬麵。韓國炸醬麵完全唔同中式炸醬麵，用黑豆醬、醬油、砂糖同生粉作為炸醬基底，食落咸咸甜甜。炸醬麵都可以自己煮，呢個炸王炸醬麵夠彈性，醬汁唔會太甜，非常香口～～

Photo from Nongshim

韓國綜藝節目《爸爸去哪兒》入面，爸爸推介農心烏龍麵同炸醬麵撈埋一齊嘅食法，而一度成為韓國大熱食品啊！

5. 不倒翁芝士拉麵

Photo from OTTOGI

公仔麵加芝士真係無得輸，小編平時就算食出前一丁，都鍾意加片芝士落去，覺得香口好多！不過成個麵都係芝士仲幸福！呢個芝士拉麵附送一包芝士粉俾你撈，食落唔會好膩，每一啖都係芝士呀！而且芝士味一啲都唔會好假～～

Photo from OTTOGI

俾個小貼士你，煮完個麵倒走啲水嘅時候，記住留返少少水，好少就夠啦！之後再撈芝士粉個麵就唔會太乾，岩岩好！

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）