【香港米芝蓮指南2021】摘星搵食懶人包~ 必試一星中菜、人氣omakase ( 附完整名單)
米芝蓮官方近日就公布咗《香港澳門米芝蓮指南 2021》,包括晒香港同澳門嘅一、二、三星餐廳,而香港共有 69 間星級餐廳!其中最高評分的三星級名單冇變,一星、二星就多了不少新餐廳上榜,一齊睇吓你心目中嘅餐廳有冇上榜?
Photo from 米芝蓮
奪得一星嘅餐廳有 50 間,雖然總數量對比起上年就少咗一間,但其中有 7 間係新入圍或者獲得晉升嘅。疫情之下大家都有好好嘅發揮,成績都算幾唔錯!香港人真係有口福呀。
中菜餐館
一星名單的中菜餐廳相對較多,其中包括:名人坊、都爹利會館、御寶軒(尖沙嘴)、蘇浙匯、甘牌燒鵝、利苑酒家(觀塘 + 旺角)、留園雅敘、六福菜館、文華廳等等。
自 2014 年起就已經登上一星餐廳列表嘅文華廳今年一樣冇令人失望,繼續蟬聯!餐廳位於文華東方酒店,用現代嘅方式為大家帶嚟傳統美食同時令菜式,精美菜色加上繁華市區夜景,絕對是一大享受!不過佢哋暫時就裝修緊,預定 2 月 1 號就會開番,想食嘅朋友仔就需要查詢網上預約喇。
Photo from 香港文華東方酒店
除咗上述餐廳,明閣(旺角)、彭慶記、潤、香宮、嘉麟樓、夏宮、添好運(深水埗)、新榮記、欣圖軒都包括喺名單度㗎!
欣圖軒自 2010 年起就已經榜上有名,2015 至 2019 年入面仲拎到二星評級,夠晒架勢!餐廳位於香港洲際酒店,除咗喺米芝蓮嘅名單上面之外,同時都有福布斯五星嘅殊榮,可以話係實力備受肯定!欣圖軒好強調要用傳統同合適嘅烹調手法去帶出食材原有嘅鮮味,所以佢哋好講究食材嘅新鮮程度。唔止咁呀,佢哋仲好有創意,有精緻嘅擺盤,亦不時推出新嘅創意菜式,聽落好似好吸引呀!
Photo from 欣圖軒
最後,一星名單上嘅中菜餐廳仲有一樂燒鵝、逸東軒(佐敦)、浙江軒、阿一海景飯店(尖沙嘴)、福臨門(灣仔)、富豪酒家(尖沙嘴)、國福樓同埋何洪記。
何洪記係香港其中一間歷史悠久嘅麵家,四十年代起已經喺灣仔創立㗎啦!搬咗去銅鑼灣之後,雖然比起以前西化咗,但食物質素依然不失水準。依家除咗粥麵之外,仲有供應埋廣式小菜同點心,食物相當多樣化!
Photo from 何洪記
新上榜嘅仲有大班樓、萬豪金殿,仲有夜上海(尖沙嘴),一星名單上面嘅中菜館多到食唔晒!
泰國菜餐廳
香港好似好多朋友仔鍾意食泰菜。一星名單上面都有一間叫「Aaharn」嘅餐廳主打泰式料理,鍾意泰國菜嘅朋友千祈唔好錯過!
Photo from Aaharn Official Instagram
地址:中環荷李活道10號大館2座1樓
法國菜餐廳
上榜嘅法式料理餐廳都唔少㗎!當中有Epure、Arcane、VEA、Louise、Petrus同埋Gaddi’s。
Gaddi’s 個名 2020 年首次上榜,今年繼續保持住榜上有名!作為香港第一間主理法式精緻法國菜嘅餐廳,位於著名嘅半島酒店入面,裝修非常華麗氣派,更加每晚都有駐場樂隊表演,絕對襯得起米芝蓮一星餐廳嘅美譽!佢哋嘅主廚用咗「現代經典」嘅風格去設計菜式,既掌握食材嘅特點去烹調,又講求技術同創意,聽落已經覺得相當吸引!
Photo from Gaddi's
西式餐廳
香港咁多西餐廳,總有一間喺你附近。榜上嘅名單包括:Beefbar、文華扒房及酒吧、Octavium、Roganic、Tosca di Angelo,仲有新上榜嘅 Andō!
第一次上榜就即刻拎到一星嘅 Andō 其實喺係 7 月嘅「疫境」底下開業,令人敬佩!佢嘅主廚創辦人係一個阿根延人,去過日本磨練廚藝。佢嘅出身同埋經歷互相融合,形成咗一個獨特而有力嘅角度,帶畀顧客一場非一般嘅美食之旅!
Photo from Andō
地址:中環威靈頓街52-54號Somptueux Central 1樓
日本料理餐廳
日本係唔少香港人嘅「鄉下」,但今年因為疫情暫時都冇得返去住,不如揀番間一星餐廳止住癮先?I M Teppanyaki & Wine、Ryota Kappou Modern、Takumi by Daisuke Mori、ZEST by Konishi,加埋新上榜嘅The Araki、Yardbird 同 Zuicho,希望可以幫到大家一解鄉愁啦!
Zuicho 係一間只會提供「omakase(廚師發辦)」Menu 嘅餐廳!菜單標榜住日本食材,而且會因應當日嘅貨源去整一道特別菜式,即係日日都有新鮮感帶俾客人。
Photo from Zuicho
地址:上環蘇杭街29號尚圜地下
印度菜餐廳
多元文化嘅香港連印度菜餐廳都有得上榜!大家不妨去 New Punjab club 試吓有質素嘅印度菜啦!
拎到二星嘅餐廳就有 12 間,同上年數量一樣,但其實當中有 2 間喺由一星餐廳晉級去二星嘅,十分厲害呀!
法國菜餐廳
二星餐廳嘅列表上有一半都係屬於法國菜,比例算係幾高!唔知有冇鍾意食法國菜嘅朋友,而名單上面又有冇大家食開嘅餐廳呢?得到二星級嘅法國餐廳包括:Arbor、Ecriture、Ta Vie、Amber,仲有兩間新上榜嘅 L’ Envol 同 Tate!
L’ Envol 上年先登上一星餐廳列表,估唔到今年已經同 Tate 一齊升埋上二星!佢位於香港瑞吉酒店,法國大廚精心製作嘅菜式連擺盤都非常有藝術感,而且服務仲好專業,完全掌握咗法式精緻餐飲嘅精髓,一定可以帶畀客人難忘嘅法國菜體驗!
Photo from L’ Envol
Tate 係第一次得到二星肯定嘅餐廳。佢由女性老闆兼主廚劉韻棋主理,悠遊喺法式料理同中菜之間,服務亦都好周到,抵佢升上二星呀!
Photo from Tate
多國菜餐廳
二星系列中出現的多國菜餐廳叫做「Bo Innovation」,入面嘅裝飾同食具,甚至係富有特色嘅創意料理全部都係對香港文化嘅讚頌!香港人去依間餐廳食嘢嘅時候會唔會特別有共鳴呢?
Photo from Bo Innovation
地址:灣仔莊士敦道60號J Senses 1樓平台8號舖
日本料理餐廳
今次二星級嘅日式料理餐廳就有兩間,分別係柏屋以及鮨.齋藤。
柏屋可能唔少香港人都食過,佢總店位於大阪,屬於過江龍嚟㗎!客人可以喺度食到最正宗嘅懷石料理,而且香港分店嘅主廚曾經效力總店長達 20 年嘅時間,味道有番一定程度嘅保證!
Photo from 柏屋
地址:中環安蘭街18號8樓
中菜館
二星級嘅中菜館有三間,分別係新同樂、天龍軒,仲有營致會館!
Photo from 營致會館
地址:中環干諾道中41號盈置大廈地下G05及1樓107-108號舖
最後,今年香港嘅米芝蓮三星餐廳就有 7 間,而且名單同上年一樣,證明佢哋喺疫情底下都保持住一向嘅水準,果然係得到米芝蓮最高評分嘅餐廳呀!
香港米芝蓮三星餐廳名單包括:
法國菜餐廳:Caprice、L’Atelier de Joel Robuchon
中菜餐館:富臨飯店、龍景軒、唐閣
意大利菜餐廳:8 1/2 Otto e Mezzo BOMBANA
日式料理餐廳:Sushi Shikon
位於四季酒店內嘅龍景軒主打粵菜,行政總廚以北京片皮烤鴨而廣受讚賞。如果想體驗廚師嘅手藝,可以揀「主廚套餐」,加埋維港美景,簡直係人生一大享受。
Photo from 龍景軒
你可以搭專屬嘅電梯或者升降機去 L’Atelier de Joel Robuchon,氣氛十足!佢哋主打時尚法國菜,用料同技巧都十分超卓,服務亦非常專業。三星嘅評級實在係實至名歸!
Photo from L’Atelier de Joel Robuchon
另外,主打物有所值嘅米芝蓮必比登名單都已經出咗,香港有成 63 間餐廳咁多!詳情可以參考番米芝蓮嘅網站~
Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)