李思雅愛犬被剝 17 隻牙後失明！　呼籲網民「千祈咪去」　動物醫院要求公開道歉

By Ivy on 02 Feb 2021

Digital Content Writer

心愛嘅寵物有病，梗係想即刻帶佢去獸醫度醫番好，等佢可以繼續舒舒服服咁過日子，所以如果去完獸醫度情況冇好轉，反而仲差咗，真係會令人好沮喪。近日，前香港小姐李思雅（Cindy）就喺網上面吐苦水，指有寵物醫院唔單止冇令佢嘅愛犬回復健康，更加令事件雪上加霜，認真慘慘。

Photo from 李思雅 Official Instagram

事件嘅主角就係灰色嗰隻狗狗，叫做 Quirky，李思雅不時都會喺 Instagram 上面大曬同佢嘅靚靚合照。

Photo from 李思雅 Official Instagram

不過，早前李思雅發現 Quirky 嘅牙齒好似有啲唔舒服，就帶咗佢去一間位於元朗嘅動物醫院睇醫生。李思雅聲稱對方診症之後指出狗狗嘅腎有問題，要佢先留醫吊鹽水，再要佢買一大堆配方糧，同埋講明之後有機會要剝牙，費用會係逐隻逐隻計算。

Photo from 李思雅 Official Instagram

李思雅決定相信獸醫嘅專業決定，並指自己問對方要剝幾多隻，但對方唔肯答，話一定要全身麻醉咗狗狗，幫佢洗完牙之後先知道。不過，當洗完牙之後，李思雅話獸醫指要剝成 17 隻牙咁多，仲要佢即場決定到底要唔要剝牙，因為依家已經全身麻醉咗，如果之後先再剝，就會又要全身麻醉多次，並指咁樣會令狗狗又要辛苦多一次。

Photo from 李思雅 Official Instagram

愛狗深切嘅李思雅希望可以盡快幫 Quirky 脫離苦海，即場就決定咗要剝牙。不幸嘅係，李思雅指剝牙之後嘅 Quirky 除咗只係得番四隻牙之外，兩隻眼竟然完全盲咗，失去晒 100% 嘅視力。經過佢多番詢問其他朋友，發現會出現咁樣嘅情況原來係因為一次過剝 17 隻牙對於狗狗嚟講太大負擔，會令佢失血過多，從而體溫太低，令雙眼嘅神經視網膜受損然後致盲。

Photo from Quirky 今次真係非常不幸

李思雅話今次嘅事件令佢非常痛心，覺得係自己無知同埋疏忽處理，一心以為係小事就冇再帶愛犬去其他動物醫院睇病。事發之後，李思雅喺網上點名，呼籲網民千祈唔好幫襯，而嗰間醫院亦都喺網上發表聲明，指出雖然的確有為過李思雅嘅愛犬治療，但對方講嘅說話只係局部，而且並唔正確，要求對方撤回全部指控，並且公開作出道歉，否則將會採取法律行動。