盤點13項新年禁忌你要知！除忌洗頭、買鞋、午睡外　原來仲有依啲絕對唔做得！

就嚟到農曆新年，而喺依個中國傳統節日中原來都有唔少嘅禁忌㗎！當中相信唔少人由細到大都聽長輩講過如忌著黑、白色嘅衣物，並喺衣著配搭上盡可能加上代表喜慶嘅紅色、買鞋、同瞓緊覺嘅人拜年外，其他仲有依啲禁忌，新一年想順順利利，咁就要記住以下嘅傳統新年禁忌喇！

Photo from TVB

1. 早上忌洗頭

「年初一唔可以洗頭」呢句說話相信大家一定聽過！其實原因係同個「洗」字有關，「洗」同「死」讀音相近，感覺唔吉利，而且「髮」同「發」嘅讀音相同，所以如果喺大年初一時洗頭，意思上就好似洗走財運咁。

Photo from shutterstock

2. 忌催人起身

難得假期打工仔們當然想瞓晏啲啦，所以各位長輩們喺大年初一，記得唔好用全名催人起身啊，因為咁樣會令對方新一年事事都被人催促，同樣唔吉利㗎！

Photo from shutterstock

3. 忌瞓晏覺

新一年唔使拜年嘅「懶瞓豬仔」，都要記得唔好喺年初一瞓晏覺啊！事關喺古時就有「禁晝寢」一說，係勸人唔好懶散，如果喺大年初一瞓晏覺，咁新一年做事就會比較散慢，有影響事業運之意！

4. 忌清潔：掃地及洗地、倒垃圾、洗衣服

新一年當然要將所有運氣通通留低啦！喺傳統而言，每家每戶都有運氣留於家中，如果喺大年初一打掃嘅話，就有將運氣、財神掃走，而且傳統上較傾向「年廿八洗邋遢」，所有打掃、洗潔工作應該喺年廿八完成！

Photo from TVB

5. 忌煮新飯、食稀粥、食藥

年初一煮食都有禁忌㗎！如果喺新一年食稀粥，就會有種「窮人食唔起飯」嘅感覺，會令新一年整年都貧窮，影響財運。同時亦唔建議大家煮新飯，應該要食除夕剩餘嘅過年飯，寓意有飯吃不完，年年有餘！另外，除咗生病，健康嘅人絕對唔適宜食補藥，就連維他命都唔好。

Photo from TVB

6. 出嫁女兒忌初一、初四、初五回娘家

已出嫁嘅女孩子初一、初四、初五最好都避免回娘家，否則傳統上會為娘家帶嚟整年衰運，而最好回娘家嘅日子就係初二！

Photo from shutterstock

7. 忌送禮送單數

年初二係出嫁女兒回娘家嘅日子嚟，依日女婿除咗要同老婆一齊回娘家外，回門禮亦忌送單數喔！

8. 忌出門拜年

大家都知道年初三又稱為「赤口」，容易禍從口出，所以唔想同人有口舌之爭，嗰日都係盡量唔好出門拜年喇！

Photo from TVB

9. 接神日忌外出

年初四係傳統民間嘅接神日，需留喺家中接眾神明、灶王爺以及家神嚟守護家人，而且傳說中灶王爺仲會點名添，所以想得到神明保佑嘅大家，記得初四唔好出街啦！

Photo from shutterstock

10. 初七諸事不宜

初七係 「人日」就人人都知，嗰日家長最好就唔好教訓小朋友。但初七其實又係「七煞日」，係諸事不宜嘅一日嚟，所以嗰日盡量都唔好出遠門。

11. 忌買鞋

新年唔好買鞋相信大家都知㗎啦！因為「鞋」同「唉」相近，如果喺過年期間買鞋，就會有一整年都「唉唉聲」之意，感覺諸事不順。所以即使睇中心意鞋款，最好都係過咗初十或者農曆二月先買啦！

Photo from shutterstock

12. 忌使用利器

傳統上利器有「破」嘅意味，可以破財、破運氣，因此喺新年期間要避免剪頭髮。講到「破」字，新年都要避免講唔吉利嘅說話，如「死」、「病」、「輸」、 「窮」、「破」等字眼。若唔小心犯禁，就要立即吐口水，說「童言無忌」等話語化解。

13. 勿借錢給別人

新年期間唔少人都會聚埋一齊玩遊戲或賭博，但切記唔好喺新年期間借錢畀人，而且所有債務亦要喺年三十晚前結清，而如果有人未還清，都唔好喺初一去對方屋企追債，否則會令你一整年都諸事不順。

其實傳統上嘅禁忌又點止咁少呀，而大部分都同民間流傳有關，以上盤點嘅禁忌，就真係「信不信由你」喇！而且禁忌嘅嘢信則有不信則無，加上新年少不免會同長輩相聚，少做嘅禁忌嘢就唔怕畀人「開年」啊嘛！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）