米酒呀！！香港首家韓國米酒餐廳，品嚐鎮店之寶，香檳一樣嘅有氣米酒～～

唔知大家有無去過尖沙咀嘅韓國街食野呢？最近尖沙咀金巴利道新開一間韓國米酒餐廳，以後大家又多一個食好野嘅地方啦～～平時食韓燒大家都鍾意飲返一兩杯，不過次次都係同一隻米酒牌子～～今次有食神啦，新開嘅呢間餐廳有多款米酒可選擇，有不同口味之餘，仲有鎮店之寶，頂級有氣米酒，真係好好飲呀！！！！

韓國人飲米酒（Makgeolli）已經有好耐歷史，相比啤酒同燒酒，韓國人更加喜愛飲米酒～呢間餐廳有不同牌子嘅米酒可以選擇，當中收藏左一款90多年歷史嘅原味米酒，係被韓國政府納入為國家文化遺產，好厲害呀～

呢度必定要試嘅餐廳鎮店之寶，頂級有氣米酒～以低溫發酵，全天然二氧化碳法製作，一扭開樽蓋嘅時候，氣泡就會慢慢升上，使用香檳杯飲用，入口好似香檳嘅有氣口感，而且有濃郁嘅米香～～好易入口，男仔女仔都好啱飲㗎～

提子味米酒，用葡萄釀製而成，飲落甜甜地，細心品嚐會有葡萄嘅味道～另外仲有一款紫薯米酒，聞落有陣陣溫和自然嘅紫薯味道，酒味道較少，入口嫩滑～

飲酒當然要配佐酒小食啦，包括韓國墨魚乾、韓國雞泡魚乾、韓國紫菜乾、韓國魷魚絲乾同韓國果仁。墨魚乾燒得超香，送酒一流！！

對韓國人來說，品嚐米酒離不開煎餅、豬肉同辣菜式～呢款辣雞腳，使用來自韓國嘅雞腳，並脫去雞腳指嘅關節，只留一條主骨，再用上Ssal Bori Ssal 招牌醬汁醃味～呢個菜式真係辣到噴火，最啱就係一同品嚐米酒！

芝士豬肋骨，豬肋骨用招牌醬汁醃味同煎香，再放上已煮溶嘅Mozzarella芝士鐵板上～～上枱嘅時候熱辣辣，做到芝士拉絲嘅效果，豬肋骨肉質鮮嫩，唔會煎得太乾身～

韓式豬手，肉質好有口感，食嘅時候可用生菜包住，再配上咸蝦汁同韓式辣豆醬一齊食～咁大分量，最好成班朋友邊食邊飲酒傾計～

店鋪資料
Ssal Bori Ssal
地址：尖沙咀金巴利道78號金輝閣地下B舖
營業時間：星期一至星期四 12:00-15:00, 17:30-23:00 ／星期五至星期六 12:00-15:00, 17:30-01:00 ／星期日 全日休息

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）
*本文章的圖片均經其本人或其公司授權，其他媒體不得轉載