蔡思貝Staycation唔著底底姊妹睇到眼都突！何雁詩爭仔不敵蔡思貝無損閨蜜情？

By Stephanie on 23 Mar 2021

Digital Content Writer

由Bob同麥玲玲所主持嘅《Master's Talk師父有請》，最新一集就邀請咗三位好閨蜜何雁詩、蔡思貝同埋賴慰玲上佢哋節目做嘉賓。佢哋三個互相爆料，關係親密，無論喺心靈上定肉體上都非常赤裸，令主持人都不禁羨慕佢哋嘅好感情～

Photo from 何雁詩IG

今期《Master's Talk師父有請》嘅主題係閨蜜，所以佢哋就邀請咗公認圈中好姐妹團嘅何雁詩、蔡思貝同埋賴慰玲。原來除咗佢哋三個之外，仲有陳瀅、吳嘉熙及陳嘉寶，仲話佢哋一齊起咗個團名叫做「SIXTERS」。

Photo from 賴慰玲IG

Bob喺一開始就先比咗個小測試嚟睇下佢哋親密程度，當被問到眾人嘅星座時，大家都口啞啞，所以問題改成眾人嘅生日日期。當問到何雁詩嘅生日時，賴慰玲就好有自信咁搶答「9月17日！」，點知正確嘅日期應該係11月2日！搞到何雁詩忍唔住笑到流淚，仲被眾人講笑咁話「大獲！佢喊喇！」

Photo from 何雁詩IG

另一位主持人麥玲玲就話內地有句名言「防火、防盜、防閨密」，所以啲人成日話女仔嘅世界係好難有真朋友。佢哋就話其實6個人嘅性格都好唔一樣，即使討論緊同一件事都會有各自嘅觀點，所以彼此從來都唔會比較。

Photo from 賴慰玲IG

而佢哋就話大家身體上同心靈上嘅透明度都好高！賴慰玲就爆料話有次佢哋全部人一齊去 staycation，而蔡思貝剛剛返到香港，行李唔喺身邊。當佢哋所有人都換曬浴袍嘅時候，就發現蔡思貝即使坐得好端正，但都比大家睇到佢走光。

Photo from 蔡思貝IG

佢哋亦表示因為成長背景同性格唔一樣嘅關係，所以擇偶條件都唔同。而唯一會令佢哋成個姊妹團瘋狂嘅男仔就係賴慰玲嘅三歲仔仔Marat ! 賴慰玲就話五位好姐妹都係仔仔嘅契媽，而仔仔就最鍾意蔡思貝，因為佢夠煩～

Photo from 賴慰玲IG

節目中，多緋聞嘅蔡思貝就被問到同余德丞、張振朗嘅關係，佢就直言同兩位嘅友情都係建基於工作上，並無私下約出嚟。而Bob就爆話余德丞曾經拍攝時玩「真心話大冒險」，話會揀蔡思貝做女朋友。佢就反駁話「外型係佢鍾意嘅，但靈魂唔係，因為我哋都太麻甩。」

Photo from 蔡思貝IG

最後，佢哋仲話希望6姐妹可以一齊合作拍戲，何雁詩就表示自己想演「企街」擺脫平常斯文形象，陳瀅扮演虔誠基督徒，賴慰玲就演唔識做戲嘅演員。仲講笑咁話希望快啲有投資者可以滿足佢哋～

Photo from 何雁詩IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

胡說八道會、處女黨等6個圈中閨蜜組織　個個都係人氣女星！

12 Mar 2021

成日都聽到人話「知人口面不知心，畀人出賣咗都唔知」，而喺娛圈更係十分常見，事關大家不時都會喺娛樂新聞睇到女星們友情不再、關係破裂等消息，但真係同行如敵國、難有真正可以交心嘅朋友咩？其實又唔一定嘅，大家只要細心留意，就會發現喺圈中都有唔少真係情同姊妹嘅閨蜜團！

1. 胡說八道會

由一班 TVB 花旦組成嘅「胡說八道會」陣容鼎盛，當初只係由三位同姓「胡」嘅胡杏兒、胡定欣、胡蓓蔚組成，後嚟再增加咗黃智雯、李施嬅和姚子羚加入。佢哋 6 人無論幾忙都會抽時間聚會，有咩事都會互相支持，姚子羚更曾笑言「有種友誼叫胡說八道」，就可知佢哋喺圈中嘅友情有幾令人羨慕喇！

2. Amazing Esther

「Amazing Esther」又被稱為「處女黨」，成員包括鍾嘉欣、王君馨、李亞男、苟芸慧及岑麗香，佢哋 5 位中分別有港姐、華姐出身，要再加上佢哋都喺外國返嚟同信仰一樣而組成，現時佢哋都已經「升呢」成為人妻！早前王君馨就喺社交網上hashtag佢哋係「索爆靚太團」添！

3. 少婦聯盟

「少婦聯盟」由龔嘉欣、沈卓盈、陳凱琳同譚凱琪組成，4 人因拍攝電視劇《平安谷之詭谷傳說》而成為好友！喺「聯盟」成立一周年時，佢哋更請嚟攝影師拍攝泳衣照作紀念！

4. M Club

除咗「少婦聯盟」，因為拍劇結緣嘅仲有《女人俱樂部》中飾演「M Club」學生時間啲佢哋，王敏奕、黃山怡（糖妹）、陳嘉寶、賴慰玲、陳瀅、吳嘉熙（Cheronna）和吳燕菁組成嘅「M Club」，佢哋 7 人喺戲裡戲外都係「老友」，雖然有人成為「新一代女神」、有人成為「幸福人妻」各自有唔同嘅發展，但只要有重要事情發生，佢哋都一定會為彼此撐場！

5. SÏXTERS

雖然陳嘉寶、賴慰玲、陳瀅佢哋已經組咗「M Club」，但佢哋喺去年 12 月仲有再組多一個閨蜜團叫「SÏXTERS」，成員就有陳嘉寶、蔡思貝、陳瀅、吳嘉熙（Cheronna）、賴慰玲同何雁詩，6人不時都會聚會，佢哋仲喺團名中大玩食字風格，以Sisters變為「SÏXTERS」，非常有創意！

6. 至八會

當然閨蜜團又點會只係年輕人嘅專利呢！喺「至八會」中個個都係阿姐級嚟，而人數仲係最多嘅一團，成員包括汪明荃、鄭裕玲、毛舜筠、曾華倩、江欣燕、林建明、朱慧珊、鍾慧冰及寇鴻萍等，全部都係圈中資深藝人及名人。正正因為佢哋嘅人數多，而且大家又各有各忙，所以就算有聚會都好難齊腳，如果真係要齊人出現嘅話，可能要 4 年先得兩次。