《愛回家》 內藏唔少唱得之人？原來佢哋都係歌手出身！ 盤點劇中 6 位不為人知音樂人

單立文早前就因為喺音樂節目《勁歌金曲》中批評 Hana 菊梓喬嘅唱功，引嚟唔少網民質疑佢喺音樂界嘅地位，但其實「豹哥」單立文除咗演戲勁之外，佢當年仲曾經以樂隊出道，被稱為「香港第一低音結他手」，可以話佢絕對有資格做評判。但其實喺處境劇《愛．回家》中亦有唔少唱得之人，絕對係藏龍臥虎之地！

Photo from 單立文/IG

1. 單立文

Photo from 單立文/IG

「豹哥」單立文從小就接觸唔同嘅音樂，其父親愛聽古典音樂唱片，母親則喜歡舞蹈音樂，而家中兩位姐姐就分別彈鋼琴及跳芭蕾舞。後嚟佢因喺音樂店中認識咗一位搖滾樂友，並喺琴行中聽咗當年「細 AL」楊雲驃教授咗一節樂理課。而喺 1983 年時，豹哥就同唐龍、黃良昇及蘇德華組成香港樂隊「Chyna」，並擔任低音吉他手，同年 5 月受到蓮花樂隊嘅周華年賞識，為《總督許冠傑演唱會》擔任其中一位樂手。

Photo from 單立文/IG

之後「豹哥」更喺紅館舉辦過《搖滾大俠奏》演唱會添，可見佢喺搖滾界嘅地方真係非一般呀！

2. 湯盈盈

Photo from Angela Tong/IG

喺《愛．回家》中飾演高栢菲（David）嘅湯盈盈唔好睇佢主要喺戲劇發展就以為佢唔唱得呀，原來佢亦唱過兩首主題曲。當年佢拍攝電視劇《兩妻時代》時，就曾與鄧健泓、梁靖琪一同合唱過主題曲《沒了沒完》，之後又曾為動畫《我們這一家》唱過主題曲《We are family》。

3. 簡淑兒

Photo from 簡淑兒/IG

飾演熊尚善青年版嘅簡淑兒，初出道時係組合「少女標本」嘅成員之一嚟，作品分別有《我不是女神》、《Simple Girl》、《留一線》等。

4. 鄭世豪

Photo from 鄭世豪/IG

飾演「細龍生」龍力士嘅鄭世豪，當年因參加《星夢傳奇》入行，當時喺比賽中仲奪得第二名，成為「星夢娛樂」嘅歌手。當年佢就曾推出《灰色命運》、《仍堅持》和《當這個時候》等多首歌曲。

5. 樊亦敏

Photo from 樊亦敏/IG

飾演「三太」白天娥嘅樊亦敏原來都係歌手嚟。佢除咗拍過李克勤嘅《一生想你》、陳百強 《只因愛你》、黎明《是愛是緣》以及譚詠麟嘅《情憑誰來定錯對》MV 外，喺 2016 年時佢曾同馬蹄露、康華一同推出合唱歌《伊人當自強》，其後，喺 2017 年時就同黎耀祥、單立文、何廣沛及傅嘉莉合唱過《財神駕到》。

6. 黎彼得

Photo from do.david/IG

要數劇中嘅唱家班當然唔可以唔數當中地位最高嘅黎彼得。當年佢同黃霑、盧國沾、鄭國江同屬香港第一代粵語流行曲填詞人，佢曾為許冠傑作過《打雀英雄傳》、《財神到》、《尖沙咀Susie》等等近百首歌曲嘅詞，可以話首首都係膾炙人口嘅大作。而喺劇中佢就同「根叔」劉丹、「大龍生」羅樂林及「譚道德」陳榮峻組成過「大四喜」，引起過唔少話題。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）