網上流傳6個創新好味即食麵食法！ 即食麵+雪糕出奇地好食？！

相信即食麵係唔少人經常食嘅食物之一，因為佢哋嘅煮法簡單又方便。但最近網上就有唔少人研發咗幾種特別嘅方法去煮即食麵，而且預備嘅材料亦好易搵到，大家不妨都可以喺屋企試下煮嚟食㗎～

Photo from TVB

蛋+大蒜+沙律醬

喺即食麵入面加蛋係唔少人本身就已經會嘅煮法，最新嘅煮法就係將蛋、切碎咗嘅大蒜、沙律醬同本身即食麵嘅調味粉撈埋一齊，用作醬料。跟住，將麵煮熟之後，就將醬料倒入麵裡面，再攪拌一下就可以食用㗎喇！

Photo from 小紅書 @33不是我

用過呢種煮法嘅網民就話，因為加咗沙律醬，所以食起上嚟會有淡淡嘅奶香味，再加上大蒜嘅香味，味道就好似食緊白汁大蒜意粉咁！如果大家想食意粉，但屋企又冇煮意粉嘅材料都可以試下用呢個方法煮即食麵～

Photo from Pinterest

起士+牛奶

相信有唔少人都好鍾意食芝士，有網民就研發咗一種可以滿足你哋嘅即食麵煮法喇！首先要將麵煮熟，跟住就將煮麵嘅水倒走，倒入一盒牛奶，並加入調味粉同蔬菜包煮，煮嘅時候記得要攪拌～攪拌好之後就可以加一片芝士，煮到佢融化牽絲，亦可以按照個人喜好加入海苔。

Photo from 小紅書 @知道吃肉肉

Photo from Pinterest

就係咁簡單就可以喺屋企食到好似牛奶鍋嘅味道喇！而網民就表示最推薦用韓國嘅辛拉麵煮，因為辛拉麵嘅辣度同牛奶芝士夾埋一齊係絕配～

Photo from Pinterest

番茄+牛奶

如果大家認為以上介紹嘅呢兩款奶味太重，不妨可以試下呢個煮法～首先將剁碎嘅番茄放入熱水煮，煮熟後就加少少嘅番茄醬調味，之後就放入即食麵同調味料去煮，再加半盒牛奶增加奶香味就可以！網民表示食起上嚟酸酸甜甜咁，好適合夏天食。

Photo from 小紅書 @七分糖去冰

Photo from Pinterest

豆漿+兩匙芝麻+一匙豆瓣醬+半匙糖

呢個食法係由日本網民研究出嚟，聽講湯頭煮完後會變得好濃郁，食落好似去咗高級拉麵店咁！不過就推薦用日本嘅即食麵口感先會比較好，好想去日本旅行嘅大家都可以試下～煮法同平時冇咩分別，只係落完麵同調味粉之後，再落300ml豆漿、一匙豆瓣醬、半匙糖同埋兩匙芝麻，就大功告成喇！

Photo from Twitter @HG7654321

Photo from Twitter @HG7654321

即食麵煎餅

呢種嘅食法就比較特別，推薦俾食麵食到好悶嘅大家試～首先，將即食麵一分為二，再放入攪拌機整碎，跟住將香腸同午餐肉都放埋入去絞碎。然後，就要預備4隻雞蛋，將絞碎好嘅麵同蛋攪拌成麵糊。之後，就落入油鍋炸至金黃焦脆就得㗎喇～有網民仲表示食起上嚟好特別，好似即食麵版嘅「米餅」咁！

Photo from Pinterest

Photo from 小紅書

即食麵雪糕

呢個食法係最近有劇集演員示範過嘅新食法！只需要直接將即食麵塊，沾上雪糕，再沾辣椒醬就得！而雪糕嘅口味就可以根據個人嘅喜好選擇，唔少網民試過都話比想像中好食㗎～另外，亦有韓國網民就研究過喺熱辣辣嘅麵上面，擺放雪糕，等佢溶咗之後就攪拌一齊食，仲曾經喺韓國成為一個套餐。

Photo from 小紅書@喵小乖

Photo from tvN

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）