張曦雯回應TVB疑似抄《ERROR自肥企画》「好嘢先抄」網民 ：咁都得？

早前，TVB旗下Youtube頻道「女神channel」封面設計被指抄襲ViuTV大熱綜藝《ERROR自肥企画》。做咗大台抄襲封面主角嘅女藝人張曦雯出席活動時被問及有關事件時，表示「唔係幾清楚發生乜事」，但覺得一樣嘢好先會被參考，回應引起網民熱議。

Photo from 張曦雯 IG

《ERROR自肥企画》於上週五(21/5)播出最終回《電視？ 為什麼？》反應熱烈，觀眾紛紛表示不捨。結局收尾方式參考《新世紀福音戰士》，帶出「娛樂碎片化」及「娛樂至死」等反思，引起網民熱議，此集數更一度在ViuTV官網下架，其後公關回應只係機件故障。最後，《自肥》大結局重新上架。

Photo from ViuTV

Viu《自肥企画》可謂由頭爆到尾，但另一邊大台則先「自爆」。TVB開始YouTube頻道「女神channel」，將張曦雯幾年前拍嘅旅遊節目《3日2夜》重新剪輯放上去，但影片封面無論文字、色彩同構圖都被指同《ERROR自肥企画》非常相似，受到大批網民抨擊，而相關集數現已下架，未知是否與此有關。

Photo from TVB 女神Channel

日前，張曦雯與陳家樂一齊出席活動，即場被問大台涉嫌抄襲事件。曦雯指佢有受到朋友傳嚟嘅報道：「朋友戥我慘，但我睇完文章都唔明白，喺自己都IG唔見有人鬧。」

Photo from 張曦雯 IG

佢強調自己唔係幾清楚發生乜事：「其實我哋拍嘢已經係公司嘅property（資產），所以我都唔知啲片會點樣用，呢個係屬於公司嘅決定，我哋做演員做artist（藝人）永遠都係最後一個先知，所以我都唔係好知、唔係好明發生咩事，so I just left it（所以我就這樣隨事件過去吧）。」

Photo from 張曦雯 IG

張曦雯表示自己同外籍男朋友都少睇本地電視節目，不論ViuTV定TVB都少看，但佢認為好嘢先會被抄襲：「有個講法係『imitation is the something flattery』（模仿就是最誠摯的恭維。），可能係一種讚美，公司覺得佢哋做得好想copy吓，但我其實唔係幾清楚發生乜事。」

Photo from 張曦雯 IG

對於張曦雯耍太極式回應，不少網民感到詫異：「咁都得？」、「有邊件老翻貨唔係『覺得好所以想複製下』？」、「以為扔句英文出黎就好勁？」，亦有人認為TVB再一次顯示其厚面皮。

Photo from 連登評論

Photo from 連登評論

有人覺得事件可看出TVB與ViuTV高低之分，佢表示ViuTV都發生過公關危機（例如：保錡感情爭議），自家員工如193及《ERROR自肥企画》嘅「格仔Mike導」亦經常公開批評電視台，但咁先夠「真」，而張曦雯則頭盔戴到盡，處理手法上高下立見。

Photo from 連登評論

但都有網友對張曦雯被利用表示同情，希望佢可以過檔ViuTV獲更好發展。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）