TVB YouTube節目又抄ViuTV《美女郊遊遊》？官方親自回應被網友直言：好厚面皮！

娛樂新聞

By Jennifer on 26 May 2021

Digital Editor

今晚食乜餸：小二，嚟一碟花生！

TVB近日因YouTube頻道影片封面同ViuTV《ERROR自肥企画》相似而被指抄襲！估唔到事隔無幾耐，再有新節目名稱同「格仔導演」Mike導另一節目撞名！令大批網友不滿留言，而官方今次更親自回應，卻被網友指好厚面皮！

Photo from ViuTV

TVB近年喺YouTube開咗唔少新頻道，積極發展網上平台，而無綫大股東之前都指公司太多山頭文化，更從管理層開始「大改革」，而副總經理曾志偉上任後，有唔少節目都迎嚟改版。

Photo from 曾志偉微博

另一間電視台ViuTV最近節目備受關注！旗下人氣爆燈嘅偶像組合MIRROR新節目《調教你MIRROR》即將播出，啱啱播完嘅《ERROR自肥企画》討論度亦相當高！

Photo from ViuTV

《ERROR自肥企画》除咗主持ERROR四位成員外，幕後一眾「無制限OT編集団」工作人員包括Agent. L、導演Mike等都人氣急升！

Photo from ViuTV

早前有網友就發現TVB旗下一個YouTube頻道「女神channel」上載咗張曦雯嘅片段，封面竟然同《ERROR自肥企画》極為相似，構圖尤如「倒模」，用字亦差唔多，惹起「抄襲」之嫌，被網友留言指：「好可悲，咁都要抄」。

Photo from 女神channel

事件傳出後頻道已將有關影片下架，而張曦雯出席活動時亦被追問，當時佢回應指唔係好清楚發生咩事，表示可能公司覺得佢哋做得好想copy下。

Photo from 張曦雯IG

估唔到呢件事過去無幾耐，TVB又再被指抄ViuTV！原來TVB旗下另一YouTube頻道「See See TVB」近日公開咗新節目，內容係由落選港姐何泳芍（Honey）帶埋一班菲律賓姐姐一齊行山執垃圾。

Photo from See See TVB

不過呢一期節目名為《Honey初體驗︰姐姐郊遊遊》，就同《ERROR自肥企画》幕後班底「無制限OT編集団」嘅另一個節目《美女郊遊遊》撞名！《美女郊遊遊》由兩位美女主持沈殷怡同陳欣妍一齊行香港各大奇山險徑，「郊遊遊」其實唔係一個常用字，因此喺影片下面有唔少網民不滿TVB疑似又再抄ViuTV：「抄到諗名都懶」。

Photo from See See TVB

Photo from ViuTV

之前TVB副總經理曾志偉就表示因為ViuTV「題材比較偏門」，又得4點收視，所以只可以同J2台比較，網友就留言指：「堂堂一個20點收視大台走去抄個得4點收視嘅台」

Photo from See See TVB

點知「See See TVB」竟然親自回覆呢個留言：「我地蚊型台，得1700 views，零點一收視都冇」，不過佢嘅回應就引嚟網友更加憤怒：「仲好意思駁嘴？我理得你YT有冇人睇啦咁大間電視台竟然容許自己班下屬去抄人哋idea 你地根本就係唔尊重成個電視業文化啦」、「姐係認抄人啦」、「不如直接轉播ViuTV節目啦」。