許留山將成為港人集體回憶！ 數網民最愛10大經典人氣美食

許留山主要係以售賣芒果甜品同飲料為主，亦係唔少來港嘅旅客會光顧嘅甜品店，高峰時期嘅佢仲曾經喺台灣開過分店！可惜好景不常，許留山嘅甜品店地位已經漸漸被取代，而家仲面臨清盤嘅困境，大家嘅童年回憶即將吿終！過去，許留山都盛載咗唔少人嘅集體回憶，而家就一齊回顧一下佢哋10大人氣美食啦！

Photo from 陳艾熙FB

芒椰奶西

可以稱得上係許留山嘅經典飲品，裡面有椰汁、芒果汁、芒果粒同埋西米，係大家想解渴時嘅首選～夏日炎炎，大家都可以用杯一邊飲芒果椰汁西米露，一邊逛街，真係好方便！

Photo from Openrice @DeniseLui8006

多芒小丸子

相信有唔少人都食過「多芒小丸子」，裡面有芒果汁、芒果粒、芒果雪糕、小丸子，冰冰涼涼，非常適合夏天食～鍾意食芒果嘅大家絕對唔可以錯過！

Photo from 許留山FB

芒の戀

「芒の戀」拼盤就包含3個迷你嘅芒果甜品，非常適合有選擇困難症嘅客人！而包含嘅甜品就有芒果小丸子、芒果雪糕同埋芒果糯米糍。

Photo from OpenRice@RubyWong1122

多芒撈河

就咁聽「多芒撈河」呢個名字可能會嚇親唔少人，但其實甜品裡面嘅河粉係用椰槳整，所以非常嫩滑，有非常特別嘅口感！

Photo from 許留山網站

芒果糯米糍

「芒果糯米糍」係其中一個非常熱門嘅外賣甜品，糯米糍嘅外皮係用咗少量芒果汁而成，再滲上椰絲，內餡就有新鮮嘅芒果餡，啖啖果肉，絕對可以滿足到愛芒果嘅大家～

Photo from Openrice@reneewaiwai

楊枝金露

講到有芒果嘅甜品，當然唔可以漏咗「楊枝金露」啦！甜品裡面有椰奶、芒果、西米、西柚果肉，酸酸嘅西柚粒同芒果非常夾，非常開胃～

Photo from Openrice@reneewaiwai

西瓜蘆薈爽

除咗芒果類嘅飲料之外，許留山仲有賣西瓜系列嘅飲品㗎！其中最出名嘅就係「西瓜蘆薈爽」，飲品裡面有西瓜汁同埋蘆薈，唔單止熱量低，仲非常消暑，係夏天必定要飲嘅飲料。

Photo from Openrice@bbkaki

粒粒芒果爽

「粒粒芒果爽」就非常適合唔太鍾意椰奶嘅人喇，因為成個飲品都係由芒果汁同芒果果肉而成，再加上寒天，口感十分特別。

Photo from OpenRice@為食鬼007

Photo from OpenRice@Kdian

鮮果鴛鴦西米撈

「鮮果鴛鴦西米撈」就係將許留山主打嘅芒果同西瓜合二為一嘅甜品，裡面有芒果汁、西瓜汁同埋西米，再加上大量嘅水果。有咁多可以消暑嘅水果，絕對係夏天嘅首選甜品！

Photo from Openrice @山區麵包王

咖哩拼盤

可能有部份人並唔知道，其實許留山都有買熱食㗎！而咖喱拼盤就係唔少90後嘅回憶，拼盤裡面有魷魚、魚蛋、白蘿蔔等，辣辣哋非常惹味。套餐仲會附上印度薄餅，曾經係唔少人午餐嘅必食之選！

Photo from 許留山FB

Photo from Openrice@Pooh's Family

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）