TVB公佈3大電視台收視率！唔計重溫/網上/App直播！《ERROR自肥企画》竟無上榜？！

TVB近日公佈上周收視成績，更罕有一同公佈埋另外兩個免費電視台ViuTV、香港開電視嘅收視率！不過採用嘅係電視直播收視率，而非「7天跨平台總收視點」，更避開早一個星期完結嘅《ERROR自肥企画》。

TVB大事大變動，搵咗「獎門人」曾志偉做副總經理、王祖藍擔任「首席創意官」，兩人上任以嚟實施唔少改革，不過都惹嚟唔少不滿，例如曾志偉喺藝員訓練班上明言會搞到好似《全民造星》咁，而且TVB YouTube平台亦屢次出現疑似抄襲，被指睇唔起ViuTV收視低但又照抄。

王祖藍就公開表示所有聲音佢哋都聽到，會盡量改進。

日前TVB公開咗三台（翡翠台、ViuTV、香港開電視）嘅收視數據，以往TVB僅公佈翡翠台嘅收視，當時有關部門解釋唔能夠代表其他台發放收視成績，而且向來採用「7天跨平台總收視點」，包括觀眾用網上平台等收睇嘅收視。

由於數據繁多，因此統計時間較長，會一次過公佈上兩星期嘅收視率，但TVB今次一改往日作風，只公開一個星期嘅數據，唔止公佈埋另外兩台嘅節目收視，更只用電視直播收視率。

TVB最高收視嘅係《愛回家之開心速遞》，電視直播平均收視為23.2，隨後嘅係《逆天寄案》（第16～20集），收視為23.1。

曾志偉、王祖藍上任後推出嘅節目《開心大綜藝》收視為17.6、喺網上口碑話題度都唔錯嘅《好聲好戲》則有15.3點。

而ViuTV由金剛主持嘅《掃街達人》，收視為2.7點、上周播出嘅《中女唔易做》收視有2.3點、星期六播出嘅經典電影《英雄本色3 夕陽之歌》收視為4.7點，係全個星期最高。至於香港開電視全星期收視率最高嘅節目係《空間改造王》，有4.4點。

由於收視率只統計上一個星期，而人氣、話題都爆燈嘅《ERROR自肥企画》因為喺再早一星期完結，所以TVB公佈嘅收視中未有《ERROR自肥企画》，另外亦無《晚吹》嘅收視。

不過TVB公佈嘅收視率，即使喺網上口碑不佳嘅節目仍有高收視，有網友認為係「龍門任佢搬」：「TVB都幾好嘢，公我贏字你輸」，又指電視直播只係「慣性收視」：「係未就係個800個電視機頂盒呀」。

之前ERROR成員193就直言收視點嗰幾百部電視機佢哋不嬲都唔介意，而曾志偉亦表示ViuTV嘅節目題材比較偏門，又僅得4點收視，只可以同J2台比較，今次一反常態，向公眾公開3大免費電視台收視，未知是否有鼓舞士氣嘅作用？

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）